ޤާސިމްގެ ކައިވެންޏަށް ނަހުލާ ރުހި ޤަބޫލު

އިއްޔެ މީސްމީޑިޔާގައި އެންމެ "ހިޓް" އެއް ވާހަކައަކީ ޖުމްހޫރީ ޕާޓީގެ ލީޑަރު، އަދި ވިލާ ކުންފުނީގެ ޗެއާމަން ގާސިމް އިބްރާހިމް އިތުރު ކައިވެންޏެއް މިހަފްތާގައި ކުރެއްވި ވާހަކައެވެ. މިއާއެކު އެންމެންވެސް ކުރަން ފެށީ އެއް ސުވާލެކެވެ. މިކައިވެންޏަށް ޤާސިމް އިބްރާހީމްގެ އަނބިކަނބަލުން ޓްރާންސްޕޯޓް މިނިސްޓަރ އައިޝަތު ނަހުލާގެ ރުހުން ލިބޭނެ ކަމާމެދު ކުރެވުނު ސުވާލެވެ. މި ސުވާލުގެ ޖަވާބު މިއަދު މިވަނީ ލިބިފައެވެ.

ނަހުލާގެ އަރިސް ބޭފުޅަކާ ހަވާލާދީ އޮންނައިން ނޫހެއް ކަމަށްވާ، "ވަގުތު" އިން ބުނެފައިވަނީ ގާސިމް ކައިވެނި ކުރައްވާފައި ވަނީ މިނިސްޓަރ ނަހުލާގެ ރުހުމާއި ފުރިހަމަ އެއްބާރުލުން ލިބިވަޑައިގެން ކަމަށެވެ.

"ކޯޓުން ވެސް ސާފު ކުރައްވާނެ ފިރިމީހާ އިތުރު ކައިވެންޏެއް ކުރައްވާނަމަ އެހެން އަނބިންގެ ރުހުން އެކަމަށް އޮތްތޯ. އެއުސޫލުން ގާސިމް އިތުރު ކައިވެންޏެއް ކުރައްވަން މިނިސްޓަރ ނަހުލާގެ ރުހުން އޮތްތޯ ވެސް ސާފުކުރި. ނަހުލާ ވަނީ ގާސިމް އިތުރު ކައިވެންޏެއް ކުރެއްވުމަށް ރުހޭކަމަށް ވިދާޅުވެފައި. އަދި ނަހުލާއަށް ދެއްވެވެން އޮތް ހުރިހާ އެއްބާރުލުމެއް ގާސިމް އިތުރު ކައިވެންޏެއް ކުރެއްވުމަށް ދެއްވި." އެމީހާ ބުނި ކަމަށް އެނޫހުގައި ރިޕޯޓްކޮށްފައިވެއެވެ.

ގާސިމާއި މިނިސްޓަރ ނަހުލާ ގެ ކައިވެންޏަަށް 13 އަހަރު ވެފައިވާއިރު އެކައިވެންޏަށް ހަ ބޭފުޅުން ލިބިވަޑައިގެންފައި ވެއެވެ. ގާސިމް އިތުރު ކައިވެންޏެއް ކުރެއްވީ މިނިސްޓަރ ނަހުލާ ވަރިކުރެއްވުމަށްފަހު ފަހުކަމަށް ބައެއް މީޑިއާތަކުން ވެސް ޚަބަރު ފަތުރާފައި ވެއެވެ. ނަމަވެސް އެއީ ޙަޤީގަތެއް ނޫން ކަމަށް "ވަގުތު" އިން ރިޕޯޓް ކުރެއެވެ.