ކޮވިޑް-19: ކުޅުދުއްފުށި މޮނީޓަރިންގެ ހާލަތުން ނަގައިފި

ހދ. ކުޅުދުއްފުށި މޮނީޓަރިންގެ ހާލަތުން ނަގައިފިއެވެ.
ކުޅުދުއްފުށި މޮނީޓަރިންގެ ހާލަތަށް ލާފައިވަނީ އެރަށު ޕޮލިސް ސްޓޭޝަންގައި މަސައްކަތް ކުރާ ފުލުހެއް އިއްޔެ ކޮވިޑް-19 އަށް ފައްސިވުމާއި ގުޅިގެން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބަލަން ޖެހޭ ކަންކަން ބެލުމަށެވެ.
ނަމަވެސް އެޗްޕީއޭ އިން މިއަދު ވަނީ އެހާލަތު އުވާލާފައެވެ.
އެޗްޕީއޭ އިން އެހާލަތު އުވާލާފައިވަނީ އާއްމު ސިއްހަތު ރައްކާތެރިކުރުމުގެ ގާނޫނުގެ 12 ވަނަ މާއްދާގެ ދަށުން ބަލަން ކަނޑައެޅުނު ކަންކަން ބެލުމުން، މޮނީޓަރިންގެ ހާލަތު އިތުރަށް ދަމަހައްޓަންޖެހޭ ސަބަބެއް މިވަގުތު ނެތް ކަމަށް ބުނެއެވެ.
އެހެންކަމުން މޮނީޓަރިންގެ ހާލަތުގަައި އަޅާފައިވާ ފިޔަވަޅުތައް ވެސް މިހާރު ނިމުމަކަށް އައިސްފައިވާނެ ކަމަށް އެޗްޕީއޭ އިން ބުނެފައިވެއެވެ.
ކުޅުދުއްފުށިން އިއްޔެ ފައްސި ވެފައިވަނީ ހދ. ކުރިނބިގައި ދިރިއުޅޭ ފުލުހެކެވެ. އެހެންކަމުން އެރަށް ވެސް ރޭގައި ވަނީ މޮނީޓަރިންގެ ހާލަތަށް ގެނެވިފައެވެ. އަދި އޭނާ އައިސޮލޭޓް ކުރެވިފައިވާ ކަމަށް ވެސް މައުލޫމާތު ލިބިފައިވެއެވެ.