ގެއަށް ދިޔަ މަގުމަތީގައި އޮތީ ސިންގާއެއް، ދުރަށް ދިޔައީ "ޕްލީސް" އޭ ބުނުމުން!
އިންޑިއާގެ ގުޖްރާތުގެ ޖީރް ނަމަކަށް ކިޔާ ޖަންގައްޔެއްގެ ފާރަވެރިޔަކު ގެއަށް ދިޔަ މަގުމަތީގައި މަގުބަންދުކޮށްގެން މަގުމެދުގައި ބަނޑު ޖަހައިގެން އޮތް ސިންގާއަކާ ދިމާވެއްޖެއެވެ. އެމީހާ ވަގުތުން ވަގުތަށް ނެގީ 32 ސިކުންތުގެ ވީޑިއޯ ކޮޅެކެވެ.
މި މީހާ ވަނީ އޭނާ ދިއުމަށް މަގުން ތަން ދެއްކުމަށް އެދި މި ސިންގާ ގާތުގައި އެދިފައެވެ. އަދި އެމީހާ ނެގި 32 ސިކުންތުގެ ވީޑިއޯގައި ވެސް އޭނާ އެ ސިންގާއާ ވާހަކަ ދައްކާ މަންޒަަރު ދައްކުވައިދެއެވެ. އެވީޑިއޯ މީސް މީޑިއާގައި ހިއްސާ ކޮށްފައިވަނީ އެ ޖަންގަލީގައި މަސައްކަތް ކުރާ ސާވިސް އޮފިސަރެއް ކަމަށްވާ ޑރ. އަންޝުމަން އެވެ.
އެ ސިންގާ ވަނީ އެމީހާ "ޕްލީސް" އޭ ބުނުމުން، އެމީހާއަށް މަގުދައްކާ ޖަންގަލީގެ ތެރެއަށް ދުއްްވައިގެންފައެވެ. މި ވީޑިއޯ ވަނީ މީސްމީޑިއާގައި ވަރަށް ވެސް ބޮޑަށް ވައިގައި ހިފާފައެވެ.
ޑރ. އަންޝުމަން އަކީ މިފަދަ ވީޑިއޯތައް މީގެ ކުރިން ވެސް ހިއްސާ ކުރާ މީހެއްކަން ފާހަގަ ކުރެވެއެވެ. ގެއަށްދާ މަގުމަތީގައި ސިންގާއެއް ފެނުމުން މިހާ ހަމަޖެހިލައިގެން ސިންގާއަކާ ވާހަކަ ދައްކާލެވޭނީ ހާދަހާ ބިރުކުޑަ މީހަކަށް ތާއެވެ. އަދި އެ ސިންގާގެ ގާތުގައި އެތަނުން ދިއުމަށް އެދި "ޕްލީސް" އޭ ބުނުމުން އެ ސިންގާއާ އެ މީހާއާ އޮތް ގުޅުން ވަރަށް ރަނގަޅަށް ދައްކުވައިދޭ ކަމަށް ވެސް ވީޑިއޯ ބެލި ބައެއް މީހުން ބުނެފައި ވެއެވެ.
