ކޮވިޑް-19: އީސީގެ ނައިބު ރައީސް އަކްރަމް ފައްސި ވެއްޖެ
އިލެކްޝަންސް ކޮމިޝަން (އީސީ) ގެ ނައިބު ރައީސް އަޙުމަދު އަކްރަމް ކޮވިޑް-19 އަށް ފައްސި ވެއްޖެއެވެ.
އެކޮމިޝަންގެ ތަރުޖަމާނުކަމުގެ މަޤާމު ވެސް އަދާ ކުރައްވަމުން ގެންދަވާ އަކްރަމް "ދެން" އަށް މައުލޫމާތު ދެއްވަމުން ވިދާޅުވީ އެމަނިކުފާނު ދިރިއުޅުއްވާ ގޭގެ އެހެން ކުއްޖަކުވެސް ކޮވިޑަށް ފައްސި ވުމާއި ގުޅިގެން އިއްޔެ އަނބިކަނބަލުންނާއެކު ޓެސްޓު ހެއްދެވީ ކަމަަށެވެ.
"މިއަދު ހެނދުނު ނަތީޖާ ލިބިގެން އެނގުނީ ފައްސިކަން. އަނބިމީހާ ވެސް ފައްސި. ނަމަވެސް އިރާދަކުރެއްވީތީ ހާލު ރަނގަޅު ދެމީހުންގެ ވެސް" އަކްރަމް ވިދާޅުވިއެވެ.
އެ ދެމަފިރިކަނބަލުން ވެސް މިވަގުތު ތިއްބެވީ ހޯމް އައިސޮލޭޝަންގައި ކަމަށް އަކްރަމް ވިދާޅުވިއެވެ.
އަކްރަމް ވިދާޅުވީ އެމަނިކުފާނު އިއްޔެ ވެސް އޮފީހަށް ވަޑައިގެންނެވި ކަމަށާއި އެހެން ނަމަވެސް އެއްވެސް ބޭފުޅަކާ ދިމާ ނުވާ ކަމަށެވެ. އަދި މިދިޔަ ހޯމަ ދުވަހު ބޭއްވި އީސީގެ ބައްދަލުވުމުގައި ބައިވެރިވެވަޑައިގެންނެވި ކަމަށާއި ނަމަވެސް އެ ކޮމިޝަންގެ ބައްދަލުވުންތައް ބާއްވަނީ ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ ގައިޑްލައިންތަކާ އެއްގޮތައް މާސްކު އަޅައިގެން ގައިދުރުކޮށްގެން ކަމަށް ވެސް ވިދާޅުވިއެވެ.
މިހާތަނަށް ރާއްޖެއިން ކޮވިޑް-19 އަށް ފައްސި ވެފައިވާ މީހުންގެ އަދަދު ވަނީ 10،600 އަށްވުރެ މައްޗަށް އަރާފައެވެ.
