ޖާބިރުގެ ވައުދު: ދިވެހިންގެ ބިން ދިވެހިންނަށް، ކޮންމެ މީހަކަށް 2000 އަކަފޫޓު
ޖާބިރުގެ ސަރުކާރެއްގައި ކޮންމެ ދިވެހި ރައްޔިތަކަަށް 2000 އަކަފޫޓުގެ ބިމެއް ދިނުމަށް ކާށިދޫ ދާއިރާގެ މެންބަރު އަބްދުﷲ ޖާބިރު ވައުދުވެވަޑައިގެންފިއެވެ.
ޖާބިރު މިހެން ވިދާޅުވީ މިއަދު އޮތް ރައްޔިތުންގެ މަޖިލީހުގައި ބިނާވެށި ޕްލޭންކުރުމާ ގުޅޭގޮތުން، މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ އަލްފާޟިލް މުޙައްމަދު އަސްލަމް މަޢުލޫމާތު ދެއްވުމަށް ފަހު މެންބަރުންނަށް ބަހުސް ކުރުމަށް ހުޅުވާލި ފުރުސަތުގައި ވާހަކަދައްކަވަމުންނެވެ.
ޖާބިރު ވަނީ މިނިސްޓަރުގެ ވާހަކަފުޅަށް ވަރަށް ބޮޑަށް ފާޑު ވިދާޅުވެފައެވެ. އެގޮތުން ޖާބިރު ވިދާޅުވީ ކިޔައި ދޭންވީ ބިން އުފެދުނު ގޮތް ނޫން ކަމަށާއި ކިޔައި ދޭންވީ ބިމުންވާ ފައިދާތައް ކަމަށެވެ.
ޖާބިރު އިތުރަށް ވިދާޅުވީ ރާއްޖޭގައި ބިމާ ގުޅޭ އެއްވެސް ޕްލޭނެއް މިއަދާ ހަމައަށް ވެސް ހެދިފައިނުވާ ކަމަށާއި ރާއްޖޭގެ ރަށް ރަށުގައި ބިން ހިއްކައިގެން މިހާތަނަށް އެއްވެސް ފައިދާއެއް ވެފައި ނުވާ ކަމަށެވެ.
އެގޮތުން ރާއްޖޭގެ ގިނަ ބިން ހިއްކާފައިވާ ގިނަ ރަށް ރަށް ފާހަގަކުރައްވައި ޖާބިރު ވަނީ މި ބިމުގައި ކުރެވުނީ ކޮން ކަމެއްތޯ ސުވާލު އުފައްދާފައެވެ.
" ތިނަދޫ ގަ ތިއޮތީ ބިން ހިއްކާފަ، ކާށިދޫގަ ބިން ހިއްކާފަ. ބިމުގައި ކޮންކަމެއްތޯ ކުރެވުނީ؟" ޖާބިރު ވިދާޅުވިއެވެ.
ޖާބިރު އިތުރަށް ވިދާޅުވީ ދިވެހިންނަށް ދިވެހިންގެ ބިން ދޭންވީ ހިލޭ ކަމަށާއި ދިވެހި ރައްޔިތުން ބޭނުން ވަނީ ބިމުގައި ގެދޮރު އަޅައިގެން ދިރިއުޅެން ކަމަށެވެ.
އަދި ޖާބިރު ވެރިކަމަށް އައި ދުވަހަކު ކޮންމެ ދިވެހި ރައްޔިތަކަށް 2000 އަކަފޫޓުގެ ބިމެއް ދޭނެ ކަމުގައި ޖާބިރު ވިދާޅުވިއެވެ.
