ކިޔެވުމަށް މޮޅީ ކަރިސްމާ ކަމަށް ބުނުމުން، އާއްމުންގެ ނުރުހުން ރަންދީރަށް!
ބޮލީވުޑްގެ އެންމެ އުހުގައި ފިޔަޖަހަމުންދާ ޢާއިލާއެއް ކަމަށްވާ "ކަޕޫރް" ޢާއިލާގެ ދެބެން، ކަރިސްމާ ކަޕޫރާއި ކަރީނާ ކަޕޫރް ޚާން އަކީ ގިނަ މީހުންނަށް މިހާރު އާ ބައެއް ނޫނެވެ.
ގިނަ ފިލްމުތަކެއްގައި ވެސް އެކްޓު ކޮށްފައިވާ ކަރިސްމާ އާއި ކަރީނާ އަކީ، އެންމެ ކުޑައިރުން ފެށިގެން ވެސް ވަރަށް ގުޅިގެން އެކުވެރިކަމާއެކު އުޅޭ ދެބެން ކަމުގައި އެމީހުން ވެސް ވަނީ އެކި އިންޓަވިއުތަކުގައި ބުނެފައެވެ.
މިފަހަރު ކަރިސްމާ އާއި ކަރީނާ އާއި ބެހޭގޮތުން ވާހަކަ ދެއްކީ އެދެމީހުންގެ ބައްޕަ ރަންދީރް ކަޕޫރެވެ.
އެގޮތުން، އެދެމީހުންގެ ތެރެއިން ކިޔެވުމަށް އެންމެ މޮޅީ ކާކުތޯ "ޕިންކްވިލާ" މެގަޒިނުން ކުރި ސުވާލަކަށް ރަންދީރް ބުނީ "ކަރިސްމާ" ކަމަށެވެ.
ރަންދީރްގެ މިޖަވާބަަށް އާއްމުންގެ ގިނަ ބަޔަކު ވަނީ ވަރަށް ބޮޑަށް ފާޑު ކިޔާފައެވެ. އެމީހުން ބުނެފައި ވަނީ ރަންދީރަށް އޭނަގެ ދަރިންނާއި ބެހޭގޮތުން އެއްވެސް އެއްޗެއް ނޭނގޭ ކަމަށާއި، ކަރިސްމާ ކިޔެވީ ހަމައެކަނި ގްރޭޑު 6 އާއި ހަމައަށް ކަމަށެވެ.
ކަރީނާ އަކީ ގްރޭޖުއޭޓަކަށްވާއިރު ކިޔެވުމަށް ކަރިސްމާ އެންމެ މޮޅުވާނީ ކިހިނެއްތޯ، އެމީހުން ސުވާލުކޮށް ރަންދީރަށް ވަރަށް ބޮޑަށް ފާޑު ކިޔާފައިވެއެވެ.
ކަރިސްމާ ވަނީ މީގެ އަހަރުތަކެއް ކުރިން ފިލްމުކުޅުން ހުއްޓާލާ، އިޖުތިމާއީ މަސައްކަތްތަކަށާއި އޭނާގެ ދެ ދަރިން ބެލުމަށް ވަގުތު ހުސްކޮށްފައެވެ. ސައިފް އަލީ ޚާން އާއި ކައިވެނި ކޮށްގެން އުޅޭ ކަރީނާ ކަޕޫރް އަދިވެސް ފިލްމު ކުޅެއެވެ. އަދި މިހާރު އޭނާ އިނީ ދެވަނަ ދަރިއަކަށް ބަލިވެއެވެ.
