މަރާލާ ، ގުނަވަންތައް ވަކިކޮށްފައި އޮތް މީހެއްގެ ހަށިގަނޑުގެ ބައިތައް ފެނިއްޖެ
ވިހާރުޕޫރް، އިންޑިއާ: މަރާލުމަށްފަހު ގުނަވަންތައް ވަކިކޮށްފައިވާ މީހެއްގެ ހަށިގަނޑުގެ ބައިތައް އިންޑިއާގެ ވިހާރު ޕޫރުން ފެނިއްޖެއެވެ.
އިންޑިއާގެ ފުލުހުންނާ ހަވާލާދީ އެގައުމުގެ މީޑިއާތައް ބުނާ ގޮތުގައި ކޮތަޅު ތަކަކަށް ލާފައިވާ މީހެއްގެ ހަށިގަނޑުގެ ބައިތައް ފެނިފައިވަނީ ހަދަމުންދާ އިމާރާތެއްގެ ކައިރިން މިދިޔަ ބުރާސްފަތި ދުވަހުގެރޭ ގައެވެ. ފުލުހުން ބުނާ ގޮތުގައި އެ ކޮތަޅުތައް ފެނި ފުލުހުންނަށް ރިޕޯޓްކޮށްފައި ވަނީ އެއްގަމުގެ ދަތުރުގެ ޚިދުމަތްދޭ މީހެއް ކަމަށްވާ ޝާހިބް ކަރުލާ ކިޔާ މީހެއް ކަމަށް ފުލުހުން ބުނެފައިވެއެވެ.
ކޮތަޅުތައް ހުރި ސަރަހައްދާ ކައިރީގައި އޮފީސް ހުންނަ ޝާހިބު އެ ތަނަށް ދިޔައީ ނުބައި ވަހެއް ދުވާތީ ކަމަށާއި ، އެހެންވެ ވަސް އަންނަ ދިމާ ބަލަމުން ދިޔައިރު އޭނާއަށް ފެނިފައިވަނީ ކޮތަޅުތަކެއްގައި ހަށިގަނޑެއްގެ ބައިތައް ހުއްޓާ ކަމަށް ރިޕޯޓްތައް ބުނެފައި ވެއެވެ. އެގޮތުން ބޮލާއި އަތްފައި ވެސް ވަނީ ވަކިކޮށްފައި ކަމަށް ފުލުހުން ބުނެފައިވެއެވެ.
ފުލުހުން މިހާރު ދަނީ އެއީ ކާކުގެ ހަށިގަނޑެއްތޯ ބެލުމުގެ މަސައްކަތް ކުރަމުންނެވެ. މި މަސައްކަތަށް ފުލުހުންނަށް ލިބިފައިވާ ފަހި އެއް ކަމަކީ ވަކިކޮށްފައިވާ އަތުގައިވާ ޓެޓޫއެކެވެ. އެ ޓެޓޫގައި "ސަންދީޕް" ލިޔެފައިވާ ކަމަށް މީޑިއާތައް ބުނެފައި ވެއެވެ.
