ރީތި ހިމަ އުނަގަނޑެއް ހޯދުމަށް ބޭނުން ވަނީ ތުވާއްޔަކާ 5 މިނެޓް!
ޒީނަތްތެރި ވުމާއި، ހަށިގަނޑު ރީތިކޮށް ބެހެއްޓުމަށް ލޯބި ކުރުމަކީ އަންހެނުންގެ ވަރަށް ޚާއްޞަ ކަމެކެވެ. ކިތަންމެ ބޭނުން ވިޔަސް އެކަމަށް މަސައްކަތް ނުކުރެވޭ މީހުން ތިބޭ ކަމީ ވެސް ހަގީގަތެކެވެ. ގިނަ ފަހަރަށް ކުރަން ޖެހޭ ކަސްރަތުގެ އުނދަގޫ ކަމާ، އެ ކަމަށް ބޭނުންވާ އާލާތްތަކާއި ހުސް ވަގުތުގެ މަދުކަމުން ވެސް އެކަން ކުރަން ނޫޅެވި ހުރެއެވެ.
ފެށިގެން މިދާ ރޯދަމަހާ އެކު ގިނަ ބައެއްގެ ބަރުދަން އިތުރުވާނެ ވާހަކައަކީ އާންމު ވާހަކަ އެކެވެ. އެހެން ކަމުން ފަސޭހައިން ކުޑަ ވަގުތު ކޮޅެއްގެ ތެރޭގައި ކޮށްލެވޭ އެހާމެ ނަތީޖާ ރަގަޅު ކަސްރަތެއް ބުނެދޭނަމެވެ.
މިއީ ޖަޕާނު މީހުން ޚާއްސަކޮށް އަންހެނުންގެ ހަށިގަނޑު ލޫޅާފަތިކޮށް ބެހެއްޓުމަށް އެގައުމުގައި އެތައް ޒަމާނެއް ކުރިންސުރެ ކުރާ ކަސްރަތެކެވެ. މި ކަސްރަތު ތަޢާރަފް ކުރީ އެގައުމުގެ ޑޮކްޓަރެއް ކަމަށްވާ ތޮޝިކީ ފުކުސުޒީއެވެ.
މި ކަސްރަތު ކުރާނެ ގޮތާއި އޭގެ ފައިދާ ބަޔާންކޮށް ޑރ. ތޮޝިކީ ލިޔުނު ފޮތަކީ އެ އަހަރު މުޅި އޭޝިޔާގައި އެންމެ ގިނައިން ވިކުނު ފޮތެވެ.
މިކަމަށް ބޭނުން ވަނީ ހަމަ އެކަނި ތުވާއްޔެކެވެ. މި ތުވާލި ދިގަށް މެދުން ފަތްޖަހާލުމަށް ފަހު އޮޅާލާށެވެ. އޮޅާލުމުން ވަށަމިނުގައި 10-7 ސެންޓިމީޓަރ ހުންނަން ވާނެއެވެ. ދެން ދުވާލި ޔޯގާމެޓެއް ނުވަތަ ކުނަލެއްގެ މަތީގައި ބޭއްވުމަށް ފަހު، ފުރަގަހަށް ތުވާލިވާ ގޮތަށް، ތުވާލި ކައިރީގައި އިށީންނާށެވެ. އިށީނދެ، ކޮނޑުގެ ފުޅާމިނަށް ދެފައި ދުރު ކޮށްލުމަށް ފަހު، ދެފައިގެ ބޮޑުވާ އިނގިލި އެތެރެއަށް ލަނބާލާށެވެ. އަދި ދެ އިނގިލި ޖެއްސޭތޯ ބަލާށެވެ. ދެން ތުވާލި މަތީގައި އޮށޯވެ، ދެއަތްތިލައިގެ ބޮޑުވާ އިނގިލި ބޭރަށް ވާ ގޮތަށް އަނބުރާލުމަށް ފަހު، ބޮލާ ދިމާލުން މައްޗަށް ދަމާލާށެވެ. އަދި އަތް ކުނާމަތީގައި ބާއްވާލާށެވެ. މި ގޮތަށް ދުވާލަކު 5 މިނިޓް އޮވެވޭ ނަމަ މައިބަދައިގެ ކަށިތައް ސީދާވެ ހަށިގަނޑު ރީތިކޮށް ހުންނާނެއެވެ.
ރެފްލޮކްސޮލޮޖީ އަދި މަސާޖްގެ މާހިރުން ހާމަ ކުރާ ގޮތުގައި މި ކަސްރަތުގެ ސަބަބުން ހަށިގަނޑުގެ މަސްތައް ވަރުގަދަވެ، ބުރަކަށީގެ ރިހުން ކެނޑި، އުނަގަނޑު ހިމަ ވާނެއެވެ. ގަވާއިދުން 30 ދުވަސް ވަންދެން މި ކަސްރަތު ކުރެވޭ ނަމަ މި ކަމުގެ އެދެވޭ ނަތީޖާ ފެންނާނެއެވެ.
ޑރ. ތޮޝިކީގެ ފޮތް ވިކި މި ކަސްރަތު ވައިގައި ހިފާފައިވާތާ މިހާރު ދެތިން މަހެއް ވެއްޖެއެވެ. މި ކަސްރަތުގެ އަޖުމަބެލި ބައެއް ފަރާތްތަކުން ހާމަ ކުރި ގޮތުގައި ބުރަކަށީގެ ތަދަށް މިއީ މޮޅު ކަސްރަތެކެވެ. އަނެއް ބަޔަކު ހާމަކުރި ގޮތުގައި، ހަށިގަނޑުގެ ބައްޓަމަށް ކޮންމެވެސް ބަދަލެއް އަތުވެއްޖެއެވެ. މިއީ ހަމައެކަނި ބުރަކަށީގެ ރިހުމަށް ލުއި ހޯދުމަށް ވަރަށް ގިނަ ގައުމުތަކުގައި ކޮށް އުޅޭ ކަމެކެވެ.
Ads by STO
