ދިއްލީ ހޮސްޕިޓަލެއްގެ ޕާކިންގ ލޮޓް ތެރޭގައި ތިން ސެކިއުރިޓީ ގާޑެއް، އަންހެނަކު ރޭޕް ކޮށްފި
އިންޑިއާގެ ނިއު ދިއްލީގައި ހުންނަ ހޮސްޕިޓަލެއްގެ ޕާކިންގ ލޮޓް ތެރޭގައި އުމުރުން 30 އަހަރުގެ އަންހެނަކު ރޭޕް ކުރި ކަމުގެ ކުށުގައި ތިން ސެކިއުރިޓީ ގާޑެއް ހައްޔަރު ކޮށްފިއެވެ.
ބޭރުގެ ރިޕޯޓުތަކުން ބުނެފައިވާ ގޮތުގައި އެއަންހެން މީހާ ރޭޕް ކުރުމުގައި ހިމެނެނީ އެހޮސްޕިޓަލުގެ ސެކިއުރިޓީ ގާޑަކާއި އެމީހާގެ އެކުވެރި އެހެން ދެ މީހެކެވެ. އެދެމީހުންނަކީ އެހެން ހޮސްޕިޓަލެއްގެ ގާޑުން ތަކެއް ކަމަަށް ވެސް ބުނެފައިވެއެވެ.
ފުލުހުންނަށް މައްސަލަ ހުށަހަޅަމުން އެއަންހެން މީހާ ބުނެފައި ވަނީ އެމީހުން އޭނާ ގޭންގް ރޭޕް ކޮށްފައި ވަނީ ބާބާ ސާހިބް ބިމް ރާއޯ އަމްބެޑްކަރް ހޮސްޕިޓަލުގައި އޮކްޓޯބަރު މަހުގެ 31 ވަނަ ދުވަހު ކަމަށެވެ.
އޭނާ އެހޮސްޕިޓަލަށް ދިޔައީ އެތަނުގައި އޮތް ބަލިމީހަކަށް ގޮވާލަން ކަމަށް ވެސް ބުނެފައިވެއެވެ.
އަންހެން މީހާއަށް އެމީހުން ބިރު ދެއްކި ކަމަށް ވެސް އޭނާ ބުނެފައި ވެއެވެ.
ސީސީޓީވީ ފުޓޭޖްގެ އެހީގައި ފުލުހުން ވަނީ އެމީހުން ދެނެގަނެ، މިމަހުގެ ދެވަނަ ދުވަހު ހައްޔަރު ކޮށްފައެވެ.
