އަންނަ އަހަރަކީ ވެސް ގޮންޖެހުންތައް ގިނަ، ދަތިކަން ބޮޑު އަހަރަކަށް ވެދާނެ- ރައީސް
ކޮވިޑް-19 އާއެކު މިކުރެވުނު ތަޖުރިބާތަކަށް ބަލާއިރު،ކުރިއަށް އޮތް އަހަރަކީ ވެސް ގޮންޖެހުންތައް ގިނަ،ދަތިކަން ބޮޑު އަހަރަކަށް ވެދާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ވިދާޅުވެއްޖެއެވެ.
ރައީސް މިހެން ވިދާޅުވެފައިވަނީ ޖުމްހޫރީ ދުވަހުގެ މުނާސަބަތުގައި މިއަދު ގައުމާއި މުހާތަބު ކުރައްވާ ވާހަކަފުޅު ދައްކަވަމުންނެވެ.
ރައީސް ވިދާޅުވީ ކޯވިޑް-19 ކުރިމަތިލީ ހަމައެކަނި ބަލިމަޑުކަމެއްގެ ގޮތުގައެއް ނޫންކަމަށާއި މިބަލި އަޅުގަނޑުމެންނާ ކުރިމަތިލީ މީގެ ކުރިން މުޅި ދުނިޔެ ވެސް ތަޖުރިބާ ނުކުރާ ފަދަ،އިޤްތިޞާދީ ބޮޑު ކާރިސާއެއްގެ ގޮތުގައި ކަމަށެވެ.
"ވަކިވަކި ފަރުދުންގެ އިޤްތިޞާދީ ފުދުންތެރިކަން އިތުރުކޮށް،ވިޔަފާރިތައް ކޮޅަށް ޖެހުމަށްޓަކައި،ދައުލަތް ހިންގުމުގެ ޚަރަދުތައް ކުޑަކޮށް، ރައްޔިތުންނާ ސީދާ ގުޅުން ހުރި މަޝްރޫޢުތަކަށާއި އިޖްތިމާޢީ ރައްކާތެރިކަމަށް، އަންނަ އަހަރުގެ ބަޖެޓުން ޖާގަ ދީފައިވާނެ. އަދި އަލަށް ތަޢާރަފްކުރި ސްކީމްތައް މެދުވެރިކޮށް، ރައްޔިތުންނަށް މާލީ އެހީތެރިކަން ފޯރުކޮށްދެމުން ދާނެ." ރައީސް ވިދާޅުވިއެވެ.
އެގޮތުން މި ބަލިމަޑުކަމުގެ ސަބަބުން ރާއްޖެއަށް އިޤްތިޞާދީ ގޮތުން ދިމާވެފައި ވަނީ ވަރަށް ބޮޑެތި ގެއްލުންތަކެއްކަމަށް ފާހަގަކޮށް ރައީސް ވިދާޅުވީ ރާއްޖެއަށް އިޤްތިޞާދު އަނބުރާ ކޮޅަށް ޖެހުމަށް ދައުލަތުގެ ހިންގުމުގެ ހަރަދު ކުޑަކޮށްފައި ވާނެ ކަމަށެވެ.
"އޭގެ ސަބަބުން ތަރައްޤީގެ މަޝްރޫޢުތަކުގެ އިސްކަންދޭ ތަރުތީބަށް ވެސް ބަދަލުގެންނަން ޖެހުނު. ނަމަވެސް، ދައުލަތް ހިންގުމުގެ ޚަރަދުތައް ކުޑަކޮށްގެން ވިޔަސް،ސަރުކާރުގެ މަޤްޞަދަކަށްވީ، ރައްޔިތުންނަށް އެހީތެރިކަން ފޯރުކޮށްދީ، އަސާސީ ޚިދުމަތްތަކަށާއި ރައްޔިތުންނަށް ލިބެންވާ ހިމާޔަތާއި ރައްކާތެރިކަމަށް،އެއްވެސް ހީނަރުކަމެއް އަޔަނުދީ، ޤައުމު ހިންގަމުން ދިޔުން." ރައީސް ވިދާޅުވިއެވެ.
Ads by STO
