ހަގީގީ ހާދިސާ: ހަގީގީ ލޯތްބަކީ މިއީ! ބައްޕަ އިޚްތިޔާރުކޮށްދިން ތަޤުވާވެރި އަނބިމީހާ ، ރީތި މީހެއްގެ ގޮތުގައި ސިފަވެގެން ދިޔަ!
ކައިވެނީގެ ގުޅުމަކީ މަތިވެރި މުޤައްދަސް ގުޅުމެކެވެ. މި ގުޅުމަކީ ދަރިފަސްކޮޅެއްގެ ސިލްސިލާގެ ބޮޅެއް ކަމަށްވީއިރު ބައިވެރިޔާއެއް ހޯދުމުގައި ބަލަންވީ ހެޔޮލަފާ މީހެއްކަމުގައި ވޭތޯއެވެ. އެފަދަ މީހެއްކަމުގައި ވެއްޖެނަމަ ކައިވެނީގެ ގުޅުން ވަރުގަދަވެ ދެމީހުންގެ މެދުގައި އޮންނަ ލޯބީގެ ގުޅުން ވަރުގަދަ ވެގެންދާނެއެވެ. ރީތިކަމުގެ ސިފަ ބައިވެރިޔާގެ ކިބައިން ފެންނާނެއެވެ.
މިއީ އެފަދައިން ކަން ހިނގި ޙަޤީޤީ ވާހަކައެކެވެ. ޝައިޚް ކަރީމް އަބޫ ޒައިދުގެ ދަރުހެއްގައި މި ވާހަކަ ކިޔައިދީފައިވެއެވެ.
އާމްދަނީ ހޯދުމަށް އެކުވެރި އަރަބި ޢިމާރާތަށް ދިރިއުޅުން ބަދަލު ކުރި މިސްރުގެ ޒުވާނެކެވެ. އެގައުމަށް ދިރިއުޅުން ބަދަލުކުރި އިރު ފަގީރު މީހެއް ނަމަވެސް ހަތަރު އަހަރު މަސައްކަތްކުރި އިރު އޭނާ ވަނީ ފައިސާ ރައްކާކޮށް ޒަވާޖީ ޙަޔާތެއް ފަށަށް ތައްޔާރުވެފައެވެ.
އޭނާގެ ބައްޕައަކީ މިސްކިތެއްގެ އިމާމެކެވެ. ހެޔޮލަފާ ޒުހުދުވެރި މީހެކެވެ. ޒުވާނާ ޒަވާޖީ ޙަޔާތެއް ފަށަށް ތައްޔާރުވުމާ އެކު އެ ޚަބަރު ބައްޕައަށް ދިނެވެ. ބައްޕާއެވެ. އަހަރެން މީހަކާ އިންނަށް ބޭނުންވެއެވެ. އިންނާނެ މީހަކު ހޯދައިދޭށެވެ. އަދި ކައިވެނީގެ ތައްޔާރީތައް ބައްޕަ ކޮށްދޭށެވެ. ތައްޔާރީތައް ހަމަޖެހުމުން އަހަރެން ބައްޕަގެ ގާތަށް ދާނަމެވެ.
ބައްޕައަށް އޮތް އިތުބާރާ އެކު އޭނާ ހުރިހާކަމެއް ބައްޕައަށް ދޫކޮށްލިއެވެ.
ކައިވެނީގެ ތައްޔާރީތައް ހަމަޖެހި މި ޒުވާނާ މިސްރަށް ހިނގައްޖެއެވެ. އަދި އޭނާގެ ބައްޕަ އޭނާއަށް އިޚްތިޔާރު ކުރި ތަޤްވާވެރި ކުއްޖާއާ ކައިވެނިކޮށްފިއެވެ.
ކައިވެނީގެ ފުރަތަމަ ރެއެވެ. އަނބިމީހާ މޫނު ބުރުގާ ނެގުމާ އެކު ޒުވާން ފިރިމީހާއަށް ޝޮކެއް ލިބިގެން ދިޔައެވެ. އަންހެން މީހާއަކީ ބަލައިލާން ރީތި މީހަކަށް ނުވުމާ އެކު އޭނާ ހާސްވެ ކަންބޮޑުވިއެވެ. އަދި އެތައް ޝަކުވާއެއް އޭނާގެ ހިތުތެރޭގައި އުތުރެން ފެށިއެވެ. ''މިއީތަ ބައްޕަ އަހަންނަށް ހޯދައިދޭން އެނގުނު ކުއްޖަކީ؟ މީނައަށް ވުރެ ރީތި ކުއްޖެއް ބައްޕައަށް ނުފެނުނީތަ؟ މިފަދަ ޝަކުވާތަކުން އޭނާ މާޔޫސްކޮށްލިއެވެ. އެއާ އެކު އަނބިމީހާއާ އެއްވެސް ވާހަކައެއް ނުދައްކާ އޭނާ ނިދިއެވެ.ނަމަވެސް ފިރިމީހާގެ އިޙްސާސްތައް އަނބިމީހާއަށް އެނގުނެވެ.
އެރޭގެ ދަންވަރުގެ ވަގުތެވެ. ރޭގެ ފަހުބައެވެ. އަނބިމީހާ ހޭލާ ފިރިމިހާއަށް ގޮވައިލިއެވެ. ނަމަވެސް ދެތިން ފަހަރަކު ގޮވައިލުމުން ވެސް ފިރިމީހާއަކަށް ނުހޭލެވުނެވެ. އެންމެފަހުން ފިރިމީހާގެ މޫނަށް ފެންފޮދެއް ވިއްސާލުމާ އެކު އޭނާއަށް ހޭލެވިއްޖެއެވެ. އެ ހިނދު އަނބިމީހާ ބުންޏެވެ. އަހަންނަކީ ރީތި މީހެއް ނޫންކަން އަހަންނަށް އެނގެއެވެ. އަދި ތިބާގެ މާޔޫސްކަމަކީ އެއީކަން ވެސް އެނގެއެވެ. ނަމަވެސް އަހަރެން ތިބާއާ ކައިވެނި ކުރީ އެންމެ ސަބަބަކަށްޓަކައެވެ. އެއީ ރަސޫލު ޞައްލަﷲގެ ޙަދީޘްފުޅަށް ޢަމަލު ކުރުމަށެވެ. މިހެން ބުނެ އަނބިމީހާ މި ޙަދީޘް ކިޔައިދިނެވެ.
އެކަލޭގެފާނުގެ ޙަދީޘް ބަސްފުޅުގައި ވެއެވެ.
ރަސޫލާ صَلَّى اللَّهُ عَلَيْهِ وَسَلَّمَ ޙަދީޘް ކުރެއްވިއެވެ. “ރޭގަނޑުގެ ވަގުތުގައި ތެދުވެ (ދަމު)ނަމާދުކޮށް އޭނާގެ އަނބިމީހާ (ދަމުނަމާދު ކުރުމަށް) ހޭލައްވައިފި، މީހަކަށް ﷲ ރަހުމަތް ލައްވާށިއެވެ. އެފަދައިން ނުތެދުވެއްޖެ ނަމަ، އޭނާ އެކަނބުލޭގެ މޫނަށް ފެންފޮދެއް ވިއްސައިލައެވެ. (އަދި) ރޭގަނޑުގެ ވަގުތުގައި ތެދުވެ (ދަމު)ނަމާދުކޮށް، އެކަނބުލޭގެ ފިރިމީހާއަށް ގޮވައި ހޭލައްވައިފި އަންހެނާއަށް ﷲ ރަޙުމަތް ލައްވާށިއެވެ. އެފަދައިން ނުތެދުވެއްޖެ ނަމަ އެކަނބުލޭގެ، އޭނާގެ ފިރިމީހާގެ މޫނަށް ފެންފޮދެއް ވިއްސައިލައެވެ”
މި ޙަދީޘް ކިޔައި ދިނުމަށްފަހު ބުންޏެވެ. އަހަރެންގެ ސިފައާ ހުރެ އަހަރެންގެ ހިތުގައި ކައިވެންޏާ މެދު ކުރިން ސުވާލު ވެސް އުފެދުނެވެ.
ނަމަވެސް އަހަރެން ތިބާއަށް ޝުކުރުވެރި ވާނަމެވެ. އަހަންނަށް ޓަކައި މި ޙަދީޘަށް ޢަމަލު ކޮށްދެއްވާށެވެ. ތެދުވެ އަހަންނާ އެކު ތަހައްޖަދު ކޮށްދޭށެވެ. މި އެދުމާ އެއްގޮތަށް ތެދުވެ ވުޟޫކޮށް އިމާމުވެ އޭނާ ތަޙައްޖަދު ކުރިއެވެ.
ތަހައްޖަދުކޮށް ނިމިގެން އޭނާގެ ފަހަތަށް އެނބުރި ބަލައިލިއެވެ. އަދި އޭނާއަށް ފެނުނު އެންމެ ރީތި އަންހެނާ ފަދައިން އޭނާއަށް އަނބިމީހާގެ މޫނު ފެނުނެވެ.
ލޯބިވާ އަޚުންނާއި އުޚުތުންނެވެ. ލޯތްބާއި ރީތިކަމަކީ ﷲ ތިބާގެ ހިތުގައި ލައްވާ ޖަޒުބާތެކެވެ. ނުވަތަ ސިފައެކެވެ. ދެމަފިރިން އެކުގައި ﷲއަށް ކިޔަމަންވެ އެކުގައި ރޭ އަޅުކަން ކުރައްވާށެވެ. މިފަދަ ތެދުވެރި ލޯތްބެއް ނުވަތަ ރީތި ކަމެއް ތިބާގެ ބައިވެރިޔާގެ ކިބައިން ފެންނާނެއެވެ. މިއަދު އެ ދެމަފިރިންގެ ދަރިންގެ ތެރޭގައި ޤުރުއާން ހިތުދަސް ދަރިންނާއި ދީނީ ޢިލްމްގެ އަހުލުވެރިން އެބަތިއްބެވެ.
ކައިވެނީގެ ގުޅުމަކީ ގޮންޖެހުން ބޮޑު ގުޅުމެކެވެ. އެއީ ޝައިތާނާގެ ކަޅި އެގުޅުމަކަށް ބޮޑު ގުޅުމެކެވެ. ވީމާ ، ޝައިތާނާއަށް ގުޑުވާނުލެވޭ ފަދަ ތެދުވެރި ލޯތްބެއް ދެމީހުންގެ މެދުގައި ޤާއިމް ކުރާށެވެ. އެފަދަ ގުޅުމެއް އުފެދޭނީ ﷲއަށް ކިޔަމަންތެރިވެގެންނެވެ. އެ އިލާހަށް ކުއްތަން ވެގެންނެވެ. ފިލްމްތަކުން ފެންނަ ''އެންޑް ދޭ ލިވްޑް ހެޕިލީ އެވަރ އާފްޓާ'' ގެ ހަގީގީ ލޯބީގެ ގުޅުމަކީ އެއީއެވެ.
Ads by STO
