8 ގަޑިއިރުގެ ފުރިހަމަ ނިންޖަކަށް ފަހުވެސް މާ ބޮޑަށް ވަރުބަލިވަނީތަ؟ މިއޮތީ ސަބަބު
އެލާމްގެ އަޑާއެކު ގިނަ ދުވަސް ދުވަހު ހޭލެވޭއިރު އަދިވެސް ނިދަން ބޭނުން ވާ ވަރަށް ނުނިދޭ ދޯ އެވެ. ގިނަ ފަހަރަށް މި ގޮތަށް ވަނީ ލަހުން ނިދުމުގެ ސަބަބުންނެވެ. އެހެންކަމުން މިއީ އާދައިގެ ކަމެކެވެ. ނަމަވެސް، 8 ގަޑިއިރުގެ ނިންޖަަށް ފަހުވެސް ވަރުބަލިކަން އިހްސާސް ކުރެވި އަދިވެސް ނިދަން ބޭނުންވާނަމަ އެއީ އާދައިގެ ކަމެއް ނޫނެވެ. އަދި މިގޮތަށް ދިމާވުމުން ދުވަހުގެ މޫޑު ގެއްލި މީހާގެ ތަބީޢަތު ގޯސް ވެއެވެ. އެހެންކަމުން 8 ގަޑިއިރުގެ ހަމަ ނިދި ލިބުމަށް ފަހު ވެސް މިފަދައިން އިހްސާސް ކުރެވޭނަމަ މީގެ ސަބަބު ހޯދަން ޖެހެއެވެ. އެގޮތުން މި ލިޔުމުގައި މި ބަލާލަނީ މިގޮތަށް ދިމާވާން މެދުވެރިވާ ބައެއް ސަބަބު ތަކާއި ދުވަސް ތާޒާ ކަމާއެކީ ފެށުމުގެ ގޮތުން ކުރެވިދާނެ ބައެއް ކަންތައްތަކަށެވެ.
ނިދާ ގަޑިއާ ކައިރިކޮށް ކަސްރަތު ކުރުން
ދުޅަހެޔޮ ސިއްހަތެއްގައި ހުރުމަށް ޓަކައި ޤަވާއިދުން ކަސްރަތު ކުރުމަކީ ވަރަށް މުހިއްމު ކަމެކެވެ. ދުވާލުގެ ވަކި ވަގުތުތަކެއްގައި ކަސްރަތުކުރުމަކީ މީހާ ތާޒާވެ ހަމަޖެހުން ލިއްބައިދޭ ކަމެކެވެ. މީގެ ސަބަބުން އަރާމު ނިންޖަކަށް މަގު ފަހިވެގެން ދެއެވެ. ނަމަވެސް، ނިދާ ގަޑިއާ މާ ކައިރިކޮށް ކަސްރަތު ކުރުމަކީ އެދެވިގެންވާ ކަމެއް ނޫނެވެ. ސަބަބަކީ ކަސްރަތު ކުރުމުން ހަށިގަނޑުގެ ޓެމްޕަރޭޗާ މަތިވެ ހިތުގެ ހިނގުން އަވަސްވުމުން ނިދަން އުނދަގޫ ވާނެތީއެވެ. އަދި މީހާ ހަމައަކަށް އެޅޭނީ އިރުކޮޅެއް ފަހުން ކަމަށް ވާތީއެވެ. މިގޮތަށް ނިދުމުން އަނެއް ދުވަހު ހޭލެވޭ އިރު ވަރުބަލިކަން އިހްސާސް ކުރެވުމަކީ އެކަށީގެންވާ ކަމެކެވެ. އެހެންކަމުން ނިދުމުގެ ވަގުތު ތަކެއް ކުރިން ކަސްރަތު ކުރުމަށް ސަމާލުކަން ދޭށެވެ.
ކެފެއިން އެކުލެވޭ ބުއިންތައް ބޭނުންކުރުން
ނިދުމުގެ ކުރިން ކޮފީއެއް ބޯލަން ހެއްޔެވެ؟ އެކަމުގެ ސަބަބުން ނިދަން ފަސޭހަ ވާނެ ކަމަށް ހީކޮށް ދޯއެވެ. ނަމަވެސް ނިދުމުގެ ކުރިން ކޮފީ ބޮއެފިނަމަ ނިދަން އުނދަގޫވެ ގިނަ އިރުތަކެއް ވަންދެން އެކަމަށް މަސައްކަތް ކުރަން ޖެހެއެވެ. އެހެންކަމުން ރޭނގަޑު ގެ ހަމަ ނިދި ނުލިބި އަނެއް ދުވަހު ހޭލަން ޖެހުމުން މީހާ ހުންނާނީ "ތާއްޔާ" ޖެހިޖެހިއެވެ. އަދި މަސައްކަތް ކުރާ ހިތް ނުވުމާއި އަރާމު ކުރަން ބޭނުން ވެއެވެ. އެހެންކަމުން ނިދުމުގެ ދެތިން ގަޑިއިރު ކުރިން ކޮފީ ބޯށެވެ. އޭރުން ކެފެއިންގެ ސަބަބުން ނުނިދި ފުރޮޅި ފުރޮޅި އޮންނާކަށް ނުޖެހޭނެއެވެ.
މާ ގިނައިން ނިދުން
މާ މަދުން ނިދުމަކީ ވެސް މީހާ ވަރުބަލި ކުރުވާ ކަމެކެވެ. ހަމައެހެންމެ މާ ގިނައިން ނިދުމަކީ ވެސް އެހާމެ ގެއްލުންހުރި ކަމެކެވެ. މާ ގިނައިން ނިދުމުގެ ސަބަބުން ހޭލެވޭ އިރު ބޯ އަނބުރާ ގޮތް ވެސް މެދުވެރިވެއެވެ. އަދި އެއްވެސް ކަމެއް ކުރާ ހިތް ނުވެ އަބަދު ވެސް ފޫހިވެފައި ހުރެވޭ ގޮތް ވެއެވެ. މިއީ ނިދާ ވަގުތު ބަދަލު ވުމުން ގިނަ މީހުންނަށް ދިމާވާ މައްސަލައެކެވެ. އެހެންކަމުން އަބަދުވެސް ނިދާ ގަޑީގައި ނިދަން އާދަކޮށް އާންމުކޮށް ހޭލާ ގަޑީގައި ހޭލަން އާދަ ކުރާށެވެ. ތަޖުރިބާކާރުން ބުނާ ގޮތުގައި ދުޅަހެޔޮ ސިއްހަތެއްގައި ހުރުމަށް އެކަށީގެން ވަނީ 7 ގަޑިއިރާއި 9 ގަޑިއިރުގެ ނިންޖެކެވެ.
މާ ގިނައިން ވިސްނާ ފިކުރުކުރުން
ސްޓްރެސް ވުމަކީ މީހާ ނިންޖާ ދުރުކުރުވާ މައިގަނޑު އެއް ސަބަބެވެ. ނިދަން އޮށޯވެ އޮންނައިރު ވެސް އެކި ކަންކަމާއި އަބަދު ވިސްނާ ނަމަ ނިދުމައް އުނދަގޫވެއެވެ. އަދި މީހާ ހާސްވެ ތަފާތު ވަސްވާސް ތަކުން ހިތް ފުރި ނަފްސު ބަލިކަށި ކުރުވައެވެ. އެހެންކަމުން އަބަދުވެސް ތިމާގެ ހިތުގައި އުފެދޭ ޚިޔާލުތަކާއި ޝުޢޫރުތައް އިތުބާރު ކުރެވޭ ފަރާތަކާ ހިއްސާކޮށް ނަފްސު ހަމައަކަށް އެޅުވުމަށް މަސައްކަތް ކުރާށެވެ. އަދި ކޮންމެ ކަމެއްގައި ވެސް ފައްސިކޮށް ވިސްނަން އާދަ ކޮށް ހިތްވަރާއެކު ތިމާއަށް ކުރިމަތިވާ ކަންތައްތަކުން އަރައިގަނެވޭނެކަން ޤަބޫލުކޮށް އަމިއްލަ ނަފްސަށް އިތުބާރު ކުރާށެވެ. އޭރުން ބޭކާރު ޚިޔާލުތަކުން ސިކުނޑި މިންޖުވެ ރޭގަނޑުގެ ހަމަ ނިދި ލިބުމަށް މަގު ފަހިވެގެން ދާނެއެވެ.
މީގެ އިތުރުން ވެސް ހަމަ ނިދި ނުލިބިދާނެ ސަބަބުތައް އެބަހުއްޓެވެ. އެގޮތުން ސިއްހީ މައްސަލަތައް ވެސް ހިމެނެއެވެ. އެހެންކަމުން ދުރާލާ މި ކަމަށް ސަމާލުކަންދީ ހައްލު ހޯދުމަށް މަސައްކަތް ކުރާށެވެ.
Ads by STO
