މަސްވެރިންނަށް ދިމާވާ ދަތިތައް ހައްލުކޮށްދޭނަން: ރައީސް
މަސްވެރިންނަށް ދިމާވާ މައްސަލަތައް ހައްލުކުރުމަށް ސަރުކާރުން މަސައްކަތްކުރަމުން އަންނަ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރައީސް މިހެން ވިދާޅުވީ މިއަދު މެންދުރުފަހު ޅ. ފެލިވަރަށް ޒިޔާރަތް ކުރައްވައި މަސްވެރިންނާ ބައްދަލު ކުރައްވައެވެ.
ރައީސް ވަނީ މިއަދު މެންދުރުފަހު ޅ. ފެލިވަރަށް ޒިޔާރަތް ކުރައްވައި ފެލިވަރު ފިޝަރީޒް ކޮމްޕްލެކްސްގެ އެކި ސަރަޙައްދުތައް ބައްލަވާލައްވާފައެވެ. އަދި މި ޒިޔާރަތުގައި ރައީސް ވަނީ މަސްވެރިންގެ މެރީނާގައި ބަހައްޓާފައިވާ 4000 މެގަޓަނުގެ އައު ކޯލްޑް ސްޓޯރޭޖްގެ ފަރުމާ ވެސް ބައްލަވާލައްވާފައިވެއެވެ.
އެގޮތުން އެމަނިކުފާނު ވަނީ އެ ވަގުތު ފެލިވަރު ފަޅުގައި އޮތް މަސްދޯންޏަކަށް އަރާވަޑައިގެން ދޯނީގައި ތިބި މަސްވެރިންނާ ބައްދަލު ކުރައްވާފައެވެ. އަދި މަސްވެރިނަށް ދިމާވާ ދަތިތަކާއި ގޮންޖެހުންތައް އޮޅުން ފިލުއްވާފައެވެ.
މަސްވެރިން އެންމެ ބޮޑު ގޮންޖެހުމަކަށް ދިމާވެފައިވާ އައިސް ލިބުމުގައި ހުރި ދަތިތަކާއި މަސްކިރުމުގައި ދިމާވާ ދަތިތައް ވަނީ ރައީސުލްޖުމްހޫރިއްޔާއާ ޙިއްޞާ ކުރައްވާފައެވެ. އަދި އެ މަނިކުފާނު ވަނީ މަސްވެރިންނަށް ދިމާވާ މައްސަލަތައް ޙައްލުކުރުމަށް ސަރުކާރުން މަސައްކަތް ކުރައްވަމުން ދާކަން ހާމަކުރައްވައި އެ މައްސަލަތައް ހައްލު ކުރައްވާނެ ކަމުގައި ވިދާޅުވެފައެވެ.
މިދަތުރުފުޅުގައި ރައީސް ވަނީ ފެލިވަރުގައި މިހާރު މަސްގަނެ ރައްކާކުރުމަށް ބޭނުންކުރާ ކޯލްޑް ސްޓޯރޭޖްގެ ހާލަތު ބައްލަވާލައްވައި، މަސް ބަންދުކުރާ ކާރުޚާނާގެ މަސައްކަތްތައް ކުރިއަށްދާ ގޮތް ބައްލަވާލައްވާފައެވެ.
