ހުއްދަ ނެތި ރާއްޖޭގައި ދިރިއުޅޭ ބިދޭސީންގެ މައްސަލަ ބަލަން ޖެހޭ : ނަޝީދު
ހުއްދަ ނެތި ރާއްޖޭގައި އުޅޭ ބިދޭސީންގެ މައްސަލަ ބަލަން ޖެހޭ ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު މިހެން ވިދާޅުވެފައި ވަނީ ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަފުޅު ދައްކަވަމުންނެވެ.
ކޮވިޑް-19އާ ގުޅިގެން ރާއްޖޭގައި މަސައްކަތް ކުރާ ބިދޭސީންނާއި ގުޅުންހުރި އެކި އެކި ކަންކަން ހާމަވެގެންދިޔަ ކަމަށް ނަޝީދު ފާހަގަ ކުރެއްވިއެވެ. އެގޮތުން ހުއްދަ ނަގައިގެން މަސައްކަތް ކުރާ ބިދޭސީންނާއި ހުއްދަ ނުނަގާ ދިިރިއުޅެމުންދާ ބިދޭސީން ފާހަގަ ކުރެވުނު ކަމަށް އެމަނިކުފާނު ވިދާޅުވިއެވެ.
"ކޮވިޑް-19 އާއި ގުޅިގެން ރާއްޖޭގައި މަސައްކަތް ކުރާ އެހެން ބިދޭސީންނާ ގުޅުންހުރި އެކި އެކި ކަންކަން ހާމަވެގެންދިޔަ ، ޚާއްސަ ގޮތެއްގައި، ދިރިއުޅުމުގެ ކަންކަން، ދިރިއުޅުމުގެ ފެންވަރު ހުންނަ ގޮތާއި، ނިދާ، ކާބޮއެ ހަދާ ގޮތާއި އަދި އެ މީހުން ރާއްޖޭގައި އުޅެނީ ހުއްދަ ނަގައިގެންތޯ، ނުވަތަ ހުއްދަ ނުނަގައި ތޯ އުޅެނީ" ނަޝީދު ވިދާޅުވިއެވެ.
އެގޮތުން ފާހަގަވި އެއް ކަމެއްގެ ގޮތުގައި ނަޝީދު ވިދާޅުވީ ހުއްދައާ ނުލާ ރާއްޖޭގައި މަސައްކަތް ކުރާ ބިދޭސީން ގިނަ ކަމެވެ. އަދި ހުއްދައާ ނުލާ ދިރިއުޅެމުންދާ ބިދޭސީން ފާހަގަކޮށް އެމީހުން ހުއްދައިގެ ތެރެއަށް ނުވަތަ އެ އޮންނަ އުސޫލެއްގެ ތެރެއަށް ގެނައުމަށް ކޮވިޑް-19 ހާލަތުގެ ތެރޭގައި މަސައްކަތް ފެށުނު ކަމަށް އެމަނިކުފާނު ވިދާޅުވިއެވެ.
" އަޅުގަނޑުގެ ހިތް ބުނަނީ ކިތައް ހުއްދަ ނެތް މީހުން ހޯދުނުބާއޭ. ކިތައް ހުއްދަ ނެތް މީހުން އަލުން އަނބުރާ އެމީހުންގެ އާއިލާތަކާ ހަވާލުކުރެވުނު ބާއޭ " ނަޝީދު ވިދާޅުވުއެވެ.
މީގެ އިތުުރުން ނަޝީދު ވިދާޅުވީ ކޮވިޑް-19އާއި ގުޅިގެން ރިސޯޓްތައް ބަންދުކުރުމާ ގުޅިގެން ރާއްޖޭގައި މަސަައްކަތް ކުރާ ބޭރު މީހުން އެނބުރި ރަށަށް ގޮސްފައި ވާނެ ކަމަށެވެ. އެހެން ނަމަވެސް އެއީ ހުއްދަ ނެތް މީހުން ނޫން ކަމަށް ނަޝީދު ފާހަގަ ކުރެއްވިއެވެ.
Ads by STO
