'ސުޕްރީމް ކޯޓުގެ ފަނޑިޔާރުންގެ އަދަދު ފަހަކަށް ބަދަލުކުރަން މަވޯޓާ، އަދީބު އަތުން 20 މިލިއަން ރުފިޔާ ނެންގެވި'
ސުޕްރީމް ކޯޓުގެ ފަނޑިޔާރުންގެ އަދަދު ފަހަކަށް ބަދަލު ކުރުމަށް މަރަދޫ ދާއިރާގެ މެންބަރު އިބްރާހިމް ޝަރީފް (މަވޯޓާ ޝަރީފް) ކުރީގެ ނައިބު ރައީސް އަހުމަދު އަދީބު އަތުން 20 މިލިއަން ރުފިޔާ ނެންގެވި ކަމަށް ބުނާ މައްސަލައެއް ފެންމަތި ވެއްޖެއެވެ.
މަވޯޓާއަށް ފައިސާ ދެއްވި ކަމަށް ވިދާޅުވީ އެމްއެމްޕީއާރުސީގެ ޚިޔާނާތާއި ގުޅިގެން އަދީބު ފުލުހުންނަށް ދެއްވި ސިއްރު ބަޔާނެއްގައެވެ. އަދީބުގެ މި ބަޔާން މިހާރު އަންނަނީ މީސް މީޑިއާގައި ދައުރުވަމުންނެވެ.
މި ބަޔާނުގައި ބުނެފައިވާ ގޮތުގައި ޝަރީފަށް، އަދީބު 20 މިލިއަން ހުށަހެޅުއްވީ ސުޕްރީމް ކޯޓުގެ ފަނޑިޔާރުންގެ އަދަދު ހަތަކުން ފަހަކަށް ބަދަލު ކުރުމަށް 'ކޯޓުތަކުގެ ގާނޫނަށް' އިސްލާހު ގެނައުމަށެވެ.
އެބަޔާނުގައި އިތުރަށް ބުނާ ގޮތުގައި އެ އިސްލާހު ހުށަހެޅުމަށް ޝަރީފް ފުރަތަމަ ފަސްޖެހުނެވެ. އަދި ޝަރީފް އާ އެކަން ހަވާލުކުރީ އެ އިސްލާހު ޕީޕީއެމްއިން ހުށައެޅުމުގެ ބަދަލުގައި އެމްޑީޕީގެ މެމްބަރެއް މެދުވެރިކޮށް ހުށަހެޅުމަށެވެ.
ނަމަވެސް ޝަރީފް އެ މަސައްކަތް ވަރަށް ފުރިހަމައަށް ކޮށްފައިވާ ކަމަށާއި އޭނާ އެކަން ކުރިކަން އެމްޑީޕީގެ މެމްބަރުންނަށް ވެސް އެނގި ނުލައްވާނެ ކަމަށާއި ވޯޓު ދެއްވިއިރު އެމްޑީޕީ މެމްބަރުންނަށް ވެސް އެކަން އެނގިނުލައްވާނެ ކަމަށް އަދީބުގެ ބަޔާނުގައި ވިދާޅުވިއެވެ.
ސުޕްރީމް ކޯޓުގައި އޭރު ތިއްބެވި ހަތް ފަނޑިޔާރުންނަކީ އޭރުގެ އުއްތަމަ ފަނޑިޔާރު އަހުމަދު ފާއިޒު އާއި ފަނޑިޔާރު އަބްދުﷲ ސައީދާއި ފަނޑިޔާރު އަބްދުﷲ އަރީފާއި ފަނޑިޔާރު އަލީ ހަމީދާއި ފަނޑިޔާރު އަހްމަދު އަބްދުﷲ ދީދީ އާއި ފަނޑިޔާރު އާދަމް މުހައްމަދު އަދި ފަނޑިޔާރު އަހްމަދު މުއުތަސިމެވެ.
ސުޕްރީމް ކޯޓުގެ ފަނޑިޔާރުންގެ އަދަދު ފަހަކަށް މަދުކުރުމަށް ޝަރީފު ހުށަހެޅުއްވި އިސްލާހަށް ތާއީދު ނުކުރަން އެމްޑީޕީގެ ގައުމީ ހިންގާ ކޮމިޓީން ފާސްކުރި ނަމަވެސް އެ އިސްލާހު މަޖިލީހަށް ޝަރީފު ހުށައެޅުއްވުމުން އެ އިސްލާހު މަޖިލީހުން ނެންގެވުމަށް އެމްޑީޕީން ހުށައެޅިއެވެ.
ޝަރީފާއި އެމްޑީޕީގެ ބައެއް މެމްބަރުންގެ ވެސް ތާއީދާއެކު ސުޕްރީމް ކޯޓުގެ ފަނޑިޔާރުންގެ އަދަދު ފަހަކަށް ބަދަލުކޮށްފައި ވަނީ 2014 ވަނަ އަހަރުގެ ޑިސެމްބަރު މަހުގެ ތެރޭގައެވެ. އަދި 2015 ވަނަ އަހަރުގެ ޖެނުއަރީގައި އުއްތަމަ ފަނޑިޔާރަކަށް ހުންނެވި އަހުމަދު ފާއިޒު ހުސައިނާއި ފަނޑިޔާރު އަހުމަދު މުއުތަސިމް އަދުނާނު ފަނޑިޔާރުކަމުން ވަކިކުރިއެވެ.
