ކާމިޔާބީއަކީ ހިތްވަރާއެކު މަސައްކަތް ކުރާ މީހެއްގެ ހައްގެެއްކަން އަހަރެން ގަބޫލު ކުރަން
ކޮންމެ ދުވަހެއްގެ އަރާ އިރާއެކު އަހަރެން ހޭލަނީ ވަރަށް ވެސް އުއްމީދާއެކީގައެވެ. ޖޯޝާއި ފޯރިއާ އެކީގައެވެ. ދުވަސް ނިމޭއިރުއި ހަމަ އެވަރަށް ޖޯޝާއި ފޯރި ހުންނާނެ ކަމުގެ އުއްމީދުގައެވެ. އެހެން ނަމަވެސް ދުވަސް ނިމޭއިރުގައި އަހަރެން އެންމެ ދެކެން ބޭނުން ވަނީ އަަހަރެން ނިދާ އެނދެވެ.
ކުރާނީ ވެސް ފަހެ ކީއް ހެއްޔެވެ؟ ދުވަހުގެ އިރު އަރަނީ އަދި އިރު އޮއްސެނީ ވެސް އޮފީހުގައި ހުއްޓައި ވިއްޔާއެވެ. މީހަކު ވަރުބަލި ވާނީ ވެސް އެވަރަކަށެވެ. އެހެން ނަމަވެސް އަހަރެންގެ މި ވަރުބަލިކަން ދުވަހަކުވެސް އަހަރެންގެ މަސައްކަތަކަށް ނުދައްކަމެވެ. ސަބަބަކީ އަހަރެންނަށް ނިދުމަށް ވުރެ މަސައްކަތް މާ މުހިންމުވީތީއެވެ.
އެންމެން ވެސް ތިބެނީ ހަމަ މިހާލެއްގައެވެ. ބައެއް ފަހަރު ހިތަށް އަރައެވެ. އޮފީހަށް ނުގޮސް ނިދަން އޮންނާާށެވެ. އެހެން ނަމަވެސް މީގައި އަހަރެންނަށް ލިބެނީ ވަގުތީ ހިތްހަމަޖެހުމެކެވެ. މަސް ނިމޭއިރުގައި މަށަށް ލިބޭ މުސާރައިން އޭގެ ބަދަލު ފެނިގެން ދެއެވެ. ކުރާނީ ވެސް ވަކި ކޮން ޝަކުވާއެއް ހެއްޔެވެ؟ ހަމަ އަހަރެންގެ ފަރުވާ ކުޑަކުމުން ވީ ކަމަކަށް ވާތީއެވެ.
އަނެއްކޮޅުން އަހަރެން އޮފީހަށް ޖެހިފައިވާ ބޮޑު ލޯތްބެއްގެ ސަބަބުންނެވެ. އޮފީހަށް ނުދަންޏާ ދުވަސް ފުރިހަމަ އެއް ނޫނެވެ. އޮފީހުގެ މާހައުލުގައި އަހަރެންނާއެކު މަސައްކަތުގައި އަވަދި ނެތި އުޅޭ އެހެން މީހުންނާ ދިމާނުވެ ދުވަސް ފުރިހަމަ ވާނީ ވެސް ފަހެ ކިހިނެއް ހެއްޔެވެ؟ އެހާމެ މަޖާ ބައެކެވެ. އެހާމެ ރައްޓެހި އަދި އެހާމެ އެކަކު އަނެކަކު ދެކެ ލޯބިވާ ބައެކެވެ. އޮފީހަށް ދާހިތް ނުވާ އެއްވެސް ސަބަބެއް ނެތީއޭ ދެންނެވުމަކީ ވެސް ގޯހެއް ނޫނެވެ.
އެހެން ވުމުގެ ސަބަބުން އަހަރެންނަށް ނިދުމަށް ވުރެ މަގޭ މަސައްކަތް މާ މުހިންމެވެ. ކިތަންމެ ނިދަން ބޭނުންވީ ކަމުގައި ވީ ނަމަވެސް އަހަރެން ހިތަވަރު ކޮށްލައިގެން މަސައްކަތަށް ދަނީ ފަހުން ކުރާނެ ފައިދާ އެނގި، ކާމިޔާބީއަކީ ބުރަކޮށް ހިތްވަރާއެކީ މަސައްކަތް ކުރާ މީހުންގެ ހައްގެއްކަން އެނގޭތީއެވެ.
