އެއް ކިލޯއަށްވުރެ ގިނަ މަސްތުވާތަކެއްޗާއެކު ހައްޔަރުކުރި ފަސް މީހަކު ކޯޓުން ދޫކޮށްލައިފި
މާލެއިން އެއް ކިލޯއަށްވުރެ ގިނަ މަސްތުވާތަކެއްޗާއެކު ހައްޔަރުކުރި ފަސް ދިވެއްސެއްގެ ބަންދުގެ މުއްދަތު ޖެހުމަށް ކޯޓަށް ހާޒިރު ކުރުމުން، އެމީހުންގެ ފަރާތުން "މުޖުތަމަޢުގެ ސަލާމަތަށް ނުރައްކަލެއް ކުރިމަތިވެދާނެ ސަބަބެއް އޮތް ކަމަކަށް ނުފެންނަ ކަމަށް" ބުނެ، ކޯޓުން އެމީހުން ދޫކޮށްލައިފިއެވެ.
ފުލުހުންގެ މީޑިއާ އޮފިޝަލަކު ވިދާޅުވީ މިއަހަރުގެ ސެޕްޓެމްބަރު މަހުގެ 14 ވަނަ ދުވަހުގެ 21:38 ގައި ފުލުހުންގެ ޑްރަގް އިންޓެލިޖެންސުން ލިބުނު މައުލޫމާތަކާ ގުޅިގެން ކޯޓު އަމުރެއްގެ ދަށުން ހ. ވައިފިނި (ހަވަނަ ފަންގިފިލާ) ބަލައިފާސް ކުރުމުން ގިނަ އަދަދެއްގެ ގިނަ އަދަދެއްގެ މަސްތުވާ ތަކެއްޗާއި މަނާ ބޭސްކަމަށް ޝައްކު ކުރެވޭ ގިނަ ޢަދަދެއްގެ ބޭސްތަކަކާއި ބަނގުރާ ކަމަށް ޝައްކު ކުރެވޭ ދިޔާ އެއްޗެއް ހުރި ފުޅިއަކާއި، ގިނަ އަދަދެއްގެ ފައިސާ ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ. މިމައްސަލައާ ގުޅިގެން ހަތް ދިވެހި ފިރިހެނުން އެއިރު ފުލުހުންގެ ބެލުމުގެ ދަށަށް ގެންދިޔަ ކަމަށާއި ނަމަވެސް އޭގެ ތެރެއިން ދެ މީހަކު ކުރިން ދޫކޮށްލާފައިވާ ކަމަށް ވެސް ފުލުހުން މައުލޫމާތު ދެއްވިއެވެ. އެދެމީހުން ދޫކޮށްލީ އެމީހުންގެ މައްޗަށް "ހެކި" ނުލިބިގެން ކަމަށް ވެސް ފުލުހުން ވިދާޅުވިއެވެ.
ހައްޔަރު ކުރި މީހުންގެ ތެރެއިން ބާކީ ތިބި ފަސް މީހުންގެ މައްޗަށް ދައުވާ އުފުލާފައި ވަނިކޮށް، އެމީހުންގެ ފަރާތުން "މުޖުތަމަޢުގެ ސަލާމަތަށް ނުރައްކަލެއް ކުރިމަތިވެދާނެ ސަބަބެއް އޮތް ކަމަކަށް ނުފެންނަ ކަމަށް" ކޯޓުން ބުނެ މިހިނގާ ޑިސެމްބަރު މަހުގެ 4 ވަނަ ދުވަހު އެހަތަރު މީހުން ދޫކޮށްލާފައިވާ ކަމަށް ފުލުހުން ވިދާޅުވިއެވެ.
މިމައްސަލައިގައި ފުލުހުން ހޯދާފައިވާ ތަކެތީގެ ތަފްސީލު:
- މަސްތުވާތަކެތި ކަމަށް ޝައްކު ކުރެވޭ އެއްޗެއްހުރި، 42 (ފިލްމް ހުސްކުރި) ދަޅު
- މަސްތުވާތަކެތިކަމަށް ޝައްކު ކުރެވޭ އެއްޗެއް އަޅާފައިހުރި 28 ރަބަރު ޕެކެޓު
- މަސްތުވާތަކެތިކަމަށް ޝައްކުކުރެވޭ އެއްޗެއްހުރި، 216 ސެލޯފީން ކޮޅު
- މަސްތުވާތަކެތިކަމަށް ޝައްކުކުރެވޭ އެއްޗެއްހުރި، 1 ޖޫސްޕެޓީ ކޮތަޅު
- މަސްތުވާތަކެތިކަމަށް ޝައްކުކުރެވޭ އެއްޗަކާއި ދުންފަތް އެއްކޮށްގެން ހަދާފައިހުރި، 1 ބިޑި
- މަނާ ބޭސް ކަމަށް ޝައްކު ކުރެވޭ 255 ގުޅަ ބޭސް
- ބަނގުރާކަމަށް ޝައްކުރެވޭ ދިޔާ އެއްޗެއް އަލާފައިހުރި Ballantine's ބްރޭންޑުގެ 1 ފުޅި
- ސަތާރަހާސް، އެއްސަތޭކަ ފަންސާސް (17،150) ރުފިޔާ
ފުލުހުން ވިދާޅުވީ އަތުލައިގަތް މަސްތުވާތަކެތީގެ ތެރޭގައި ހިމެނެނީ އެއްކިލޯއަށްވުރެ ގިނަ ކެނަބިސް އާއި 108 ގްރާމް އެމްޑީއެމްއޭ އާއި ހަތް ގްރާމު ހެރޮއިން ކަމަށެވެ.
