ކޮވިޑް-19: ސާވޭގައި ބައިވެރިވި 10 އިންސައްތަ މީހުންނަށް ބަލި ޖެހިފައިވަނީ ނޭނގި
މާލެއިން 38،000 މީހުން ކޮވިޑް-19 ފައްސިވި ކަމަށް މާލޭގައި ކުރިއަށް ގެންދިޔަ އެންޓި ބޮޑީސް ދިރާސާ އިން ދައްކާފައިވާއިރު، އޭގެތެރެއިން 10 އިންސައްތަ މީހުންނަށް ބަލި ޖެހި ރަނގަޅުވެފައި ވަނީ ބަލި ޖެހުނު ކަން ނޭނގި ކަމުގައި އިމަރޖެންސީ އޮޕަރޭޝަން ސެންޓަރ (އެޗް.އީ.އޯ.ސީ)އިން ވިދާޅުވެއްޖެއެވެ.
ހެލްތް ޕްރޮޓެކްޝަން އޭޖެންސީ އާއި އެމްއެންޔޫ ގުޅިގެން މާލޭގައި ކޮވިޑް-19 ފެތުރިފައިވާ މިންވަރު ބެލުމަށް ކުރިއަށް ގެންދިޔަ ދިރާސާގެ ނަތީޖާ ވަނީ ރޭ އާންމު ކޮށްފައެވެ.
ސީރޯ ޕްރިވަލެންސް ސަރވޭގެ ހޯދުންތަކުން ދައްކާ ގޮތުގައި މާލޭގެ އާބާދީގެ 13.4 އިންސައްތަ މީހުނަށް ކޮވިޑް-19 ޖެހިފައިވާ ކަމަށް ބެލެވެއެވެ. މި މީހުންގެ ހަށިގަނޑުން ވަނީ އެންޓިބޮޑީ ފެނިފައެވެ، އަދި އަދި %86.6 މީހުންގެ ހަށިގަނޑުން ކޯވިޑް-19 ޖައްސާ ވައިރަހާ ދެކޮޅަށް ހަނގުރާމަ ކުރާނެ އެންޓިބޮޑީސް ފެނިފައިނުވާއިރު، އެމީހުން ބައްޔަށް ފައްސިވެފައިވާ ކަމަށް ނުބެލެވޭނެއެވެ.
މީގެ އިތުރުން ވެސް މި ދިރާސާއިން ދެއްކި ގޮތުގައި މާލޭގައި ދިރިއުޅޭ ކޮންމެ 11 ދިވެއްސަކުން އެކަކަށް ވަނީ ބަލި ޖެހިފައެވެ.
އަދި ދިވެހިންނަށްވުރެ ފައްސިވި ބިދޭސީންގެ އަދަދު ގިނައިރު، ބިދޭސީންގެ %36.4 މީހުންގެ ހަށިގަނޑުން އެންޓިބޮޑީޒް ފެނިފައިވާއިރު، އެއީ ބިދޭސީންގެ ތެރެއިން ކޮންމެ 3 މީހަކުން އެކަކެވެ.
ކޮވިޑް-19އަށް ފައްސިވެފައިވާ މީހުންގެ ތެރެއިން އެންޓިބޮޑީޒް ފެނިފައި ވަނީ %57.9 މީހުންގެ ހަށިގަނޑުންނެވެ. އަދި %42.1 މީހުންގެ ހަށިގަނޑަކުން އެންޓިބޮޑީޒް ފެނިފައެއް ނުވެއެވެ. ކުރިން ބަލި ޖެހިފައިވާކަން ނޭނގޭ މީހުންގެ ތެރެއިން އެންޓިބޮޑީޒް ފެނިފައި ވަނީ އެންމެ %10 މީހުންގެ ހަށިގަނޑުންނެވެ. އަދި %90 މީހުންގެ ހަށިގަނޑަކުން އެންޓިބޮޑީޒް ފެނިފައެއް ނުވެއެވެ.
ދިރާސާއާ ގުޅޭ މައުލޫމާތު ހާމަކުރަމުން އެމްއެންޔޫގެ ޑިރެކްޓަރ އޮފް ރިސާޗް ޑރ.ރަހީމާ އަބްދުއްރަހީމް ވިދާޅުވީ އެންޓިބޮޑީސް ހުންނަ މިންވަރު، ދުވަސް ވަމުންދާ ވަރަކަށް މަދުވާކަން ފާހަގަ ވެފައިވާ ކަމަށެވެ.
"ބޭރު ޤައުމުތަކުގެ ދިރާސާތަކުން ވެސް ދައްކާގޮތުން ބައެއް ދިރާސާތަކުން ދައްކަނީ އެންޓިބޮޑީޒް 3 މަސް ވަންދެން ހުންނަކަމަށް. އަނެއްބައި ދިރާސާތަކުން 6 މަސް ވަންދެން. އަޅުގަނޑުމެން މި ހެދި ސަރވޭއިން ވެސް ދައްކާގޮތުގައި ބައެއް މީހުންގެ އެންޓިބޮޑީޒް މި ހުންނަނީ 3 މަސް ވަންދެން. އަނެއްބައި މީހުންގެ 6 ވަންދެން އެބަހުރޭ. އެހެންވީމަ ކަނޑައެޅިގެން މިހާ ދުވަހަށޭ އެންޓިބޮޑީޒް ހުންނާނީ ދަންނަވާކަށް ނޭނގޭނެ. ނަމަވެސް ޔަޤީންކަމާއެކީ ބުނެވެން އެބައޮތް ނަތީޖާތަކަށް ބަލާނަމަ ދުވަސް ވާވަރަކަށް އެންޓިބޮޑީ މަދުވަމުންދާކަން" ޑރ.ރަހީމާ ވިދާޅުވިއެވެ.
Ads by STO
