މުސްތަފާ އަތުން ވެސް ގާސިމް ހަތް ލައްކަ ރުފިޔާ ފޭރިގަތް ކަމަށް ބުނެފި
ތިމަރަފުށީ ދާއިރާގެ ކުރީގެ މަޖިލިސް މެންބަރު މުހައްމަދު މުސްތަފާ އަތުން ވެސް ވިޔަފާރިވެރިޔާ އަދި މާމިގިލި ދާއިރާގެ މެންބަރު ގާސިމް އިބްރާހިމް 7 ލައްކަ ރުފިޔާ ފޭރިގަތް ކަމަށް މުސްތަފާ ވިދާޅުވެއްޖެއެވެ.
މުސްތަފާ މިހެން ވިދާޅުވެފައި މިވަނީ ޖަޕާނު މީހެއްގެ އަތުން ގާސިމް 15 މިލިއަން ޑޮލަރު އަތުލި ކަމަށް ބުނެ، މުސްތަފާ ދެއްކެވި ވާހަކަ ގާސިމް ދޮގު ކުރައްވާފައި ވަނިކޮށެވެ.
މުސްޠަފާ އިއްޔެ ކުރެއްވި ޓްވީޓެއްގައި ވިދާޅުވެފައި ވަނީ ގާސިމް، ޖަޕާނު މީހެއް އިނދަ ޖައްސާލާފައިވާ ކަމަށާއި، 15 މިލިއަން ޑޮލަރު އޭނާގެ އަތުން "ކައްވާލާފައި" ވާކަމަށެވެ.
މީގެ އިތުރުން މުސްޠަފާ ކުރެއްވި ޓްވީޓްގައި ވަނީ ސަރުކާރުގެ ކޯލިޝަނެއް ކިޔައިގެން އުޅެނީ ވައްކަން ކުރަން ކަމަށާއި އިތުރަށް ގާސިމް އެއްޗެކޭ ވިދާޅުވެއްޖެ ނަމަ މުޅި އެތި ފަޅާ އަރުވާލާނެ ކަމަށެވެ.
މުސްތަފާގެ ވާހަކަތަކަށް ރައްދު ދެއްވަމުން ގާސިމް ކުރެއްވި ޓްވީޓެއްގައި ވިދާޅުވީ މުސްޠަފާ އޭނާއޭ ކިޔައިގެން ޓްވިޓާގައި ދައްކާފައި ވަނީ އެއްވެސް ހަގީގަތެއް ނެތް ދޮގު ވާހަކަތަކެއް ކަމަށެވެ.
މިކަމަށް ރައްދު ދެއްވައި މުސްތަފާ ކުރެއްވި ޓްވީޓުގައި ވަނީ 1994 ވަނަ ގާސިމް، މުސްތަފާ އަތުން ވެސް ހަތް ލައްކަ ރުފިޔާ ނެންގެވި ކަމަށް ތުހުމަތު ކުރައްވާފައެވެ.
"ގާސިމް 1994 ވަނަ އަހަރު މަގޭ އަތުން ފޭރިގައި -/50000 ޑޮލަރުގެ މައްސަލައިގައި ގާސިމް ފުލުހަށް ދާން ޖެހުނީ ވެސް ތިކަހަލަ ދޮގު ހައްދަވާތީވެ. އިތުރު ވާހަކަ ދައްކަންޏާ ވާނީ އިތުރަށް ބޭޒާރު." މުސްތަފާގެ ޓްވީޓްގައި ވިދާޅުވެފައި ވެއެވެ.
