ރައީސް ޔާމީންގެ މަންމާފުޅުގެ ހާލުދެރަވެ އެޑްމިޓު ކޮށްފި
ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ގެ މަންމާފުޅު ފާތުމަތު ހަސަން (83އ.)ގެ ބަލި ހާލު ދެރަވެ ހޮސްޕިޓަލުގައި އެޑްމިޓު ކޮށްފިއެވެ.
ރައީސް ޔާމީންގެ މަންމާފުޅު ދިރިއުޅުއްވަނީ ދަރިކަނބަލުން މުސްލިމާ އަބްދުލް ގައްޔޫމްގެ އަރިހުގައި އަވަށްޓެރި ޝްރީލަންކާގެ ވެރިރަށް ކޮލަމްބޯގައެވެ.
އެނގިފައިވާ ގޮތުގައި ރައީސް ޔާމީންގެ މަންމާފުޅު އާލާސްކަންފުޅާ އުޅުއްވާ، އެކަމަނާއަށް ހޮސްޕިޓަލުގައި ފަރުވާ ދެމުން ގެންދަވާތާ މިހާރު ހަފްތާއެއްހާ ދުވަސް ވެއްޖެއެވެ. ނަމަވެސް އެކަމަނާއަށް ޖެހިވަޑައިގެންފައި ވަނީ ކޮން ކަހަލަ އާލާސްކަންފުޅެއް ކަމެއް އެނގިފައެއް ނުވެއެވެ.
ކުރީގެ ރައީސް ޢަބްދުﷲ ޔާމީންގެ މަންމާފުޅު އާލާސްކަންފުޅާ އުޅުއްވާ، ހޮސްޕިޓަލުގައި އެޑްމިޓު ކުރައްވާފައި އޮތްއިރު، އެމަނިިކުފާނުގެ ވަނީ އެމްއެމްޕީއާރްސީގެ ޚިޔާނާތާ ގުޅޭ މަނީ ލޯންޑަރިންގެ މައްސަލައެއްގައި ފަސް އަހަރު ދުވަހުގެ ޖަލު ހުކުމެއް އިއްވާފައެވެ. އެހުކުމުން އެމަނިކުފާނު މިހާރު ވަނީ އެއް އަހަރު ދުވަސް ތަންފީޒު ކުރައްވާފައެވެ. އެމަނިކުފާނު ޖަލުގައި ހުންނަވަނިކޮށް އެއްބަފައި ދައްތާފުޅު މޫމިނާ ޢަބްދުލްޤައްޔޫމް ވެސް ވަނީ އަވަހާރަވެފައެވެ.
ރައީސް ޔާމީންގެ މަންމާފުޅުގެ ތިއްބަވަނީ އެމަނިކުފާނާއެކު ހަ ބޭފުޅުންނެވެ. އެއީ ފަސް ފިރިހެން ބޭފުޅުންނާއި އަންހެން ބޭކަނބަލެކެވެ.
ރައީސް ޔާމީންގެ މަންމާފުޅަށް ، މާތްﷲ އަވަސް ޝިފާއެއް މިންވަރު ކޮށްދެއްވާށިއެވެ. އާމީން!
އާމީން