ރާއްޖެއިން ފުރަތަމަ ވެކްސިން ޖެހޭނީ ދެ ލައްކަ މީހުންނަށް
ރާއްޖޭގައި ކޮވިޑް-19 އިން ރައްކާތެރިވުމަށް ޖަހާ "ކޮވެކްސް" ވެކްސިން ގެ ދަށުން ފުރަތަމަ ވެކްސިން ޖެހޭނީ ދެ ލައްކަ މީހުނަށް ކަމަށް މައުލޫމާތު ލިބިއްޖެއެވެ.
"ރާއްޖެޓީވީ" އިން ރިޕޯޓުކޮށްފައިވާ ގޮތުގައި ކޮވެކްސް ފެސިލިޓީގެ ދަށުން ރާއްޖެއަށް ލިބުމަށް ހަމަޖެހިފައި ވަނީ ހަތަރު ލައްކަ ޑޯޒް ވެކްސިންއެވެ.
ޚަބަރު ލިބިފައިވާ ގޮތުގައި ވެކްސިން ރާއްޖެ ގެނައުމުގައި ލަސްވަނީ ވެކްސިން ރައްކާކުރާނެ ތަނެއް ހަމަނުޖެހިގެންނެވެ.
ކޮވިޑް-19 ވެކްސިންއާ ގުޅޭ ގޮތުން މައުލޫމާތު ދިނުމަށް މިދިޔަ ހަފްތާގައި ބޭއްވި ނޫސްވެރިންގެ ބައްދަލުވުމުގައި ހެލްތު އެމަޖެންސީ އޮޕަރޭޝަންސް ސެންޓާރ (އެޗްއީއޯސީ)ގެ ތަރުޖަމާނު ޑރ. ނަޒްލާ ރަފީޤް ވިދާޅުވީ ކޮވެކްސް ފެސިލިޓީން ރާއްޖޭގެ އާބާދީގެ 20 އިންސައްތައަށް ހިލޭ ވެކްސިން ހޯދުމަށް ހުށައެޅި ހުށައެޅުން ރަސްމީކޮށް ޑަބްލިޔުއެޗްއޯއިން ގަބޫލުކޮށްފައިވާ ކަމަށާއި އެކަމަށް ވާންޖެހޭ ތައްޔާރީތައް މިހާރު ވަމުން އަންނަ ކަމަށެވެ.
ކޮވިޑް-19 އިން ރައްކާތެރި ވުމަށް ވެކްސިން ޖެހޭނީ ރާއްޖޭގެ އާބާދީގެ އެންމެންނަށް ނޫން ކަމަށާއި، ވެކްސިން ޖަހާނީ އެވެކްސިނަށް ހައްގު މީހުންނަށް އެކަނި ކަމަށް ވެސް ނަޒްލާ ވިދާޅުވިއެވެ.
ޑރ. ނަޒްލާ ވިދާޅުވީ ކޮވެކްސް ފެސިލިޓީގެ ބޭރުން ވެސް ވެކްސިން ގަތުމަށް ސަރުކާރުން މަސައްކަތް ކުރަމުންދާ ކަމަށެވެ.
"މިކަމަށް ހިނގާނެ ޚަރަދު ނުވަތަ އެކަމަށް ކުރަންޖެހޭ ހޭދަ ކުރުމަށް ސަރުކާރުން އޮތީ ތައްޔާރަށް. މީގަ ދައްޗަކަށް ކުރިމަތިވާ ކަމަކީ، ހުރިހާ ޤައުމުތަކަށް ވެސް އުފެއްދިފައި ހުރީ މަދު ވެކްސިންތަކެއް. މިވެކްސިންކޮޅު ހުރިހާ އެންމެން ވެސް ބޭނުންވަނީ. އެހެންވީމަ ވެކްސިން ސަޕްލައިގައި މައްސަލަތަކެއް އުޅޭނެ ކަމަށް އަޅުގަނޑުމެންނަށް ބެލެވެނީ" ޑރ. ނަޒްލާ ވިދާޅުވިއެވެ.
