ފިނި ހޫނުމިން ބަލާ ބަޑި ބޭނުން ކުރުމަކީ ބޭކާރުކަމެއް!
ކޮވިޑް-19 އިން ރައްކާތެރިވުމަށް ބޭނުން ކުރާ ފިނިހޫނުމިން ބަލާ ބަޑި ބޭނުން ކުރުމަކީ ބޭކާރު ކަމެއް ކަމަށް ދިރާސާއަކުން ދައްކައިފިއެވެ.
ކޮވިޑް-19 ފެތުރެން ފެށުމާއެކު ފިނިހޫނުމިން ބަލާ ބަޑި ބޭނުން ކުރުން ވަނީ މުޅި ދުނިޔޭގައި ވެސް ވަރަށް އާންމު ވެގެން ގޮސްފައެވެ. އެގޮތުން ފިހާރަތަކާއި ރެސްޓޯރެންޓުތައް ފަދަ އާންމުން ގޮސް އުޅޭ ތަންތަނުގައި ފިނިހޫނުމިން ބަލާ ބަޑި އަންނަނީ ބޭނުން ކުރަމުންނެވެ.
ޖޯން ހޮޕްކިންސް ސުކޫލް އޮފް މެޑިސިންގެ ދިރާސާވެރިން ބުނި ގޮތުގައި ބަޑިން މީހާގެ ފިނިހޫނުމިން ބެލި ކަމުގައި ވިޔަސް ކޮވިޑް-19 ފެތުރުން ހުއްޓުވައެއްނުދެއެވެ. އަދި އެކަމަށް އެހީއެއް ވެސް ނުވެއެވެ.
އެގޮތުން ޖެނުއަރީ އިން ސެޕްޓެމްބަރަށް ސީޑީސީން އައިއާރް ބަޑި ބޭނުން ކޮށްގެން 766,000 މީހުންގެ ފިނިހޫނުމިން ބަލާފައިވާއިރު މީގެ ތެރެއިން ކޮވިޑް-19 އަށް ފައްސިވެފައި ވަނީ އެކަކުކަން ދިރާސާވެރިން ވަނީ ފާހަގަ ކޮށްފައެވެ.
މި ދިރާސާގައި އިތުރަށް ބުނެފައިވާ ގޮތުގައި ފިނިހޫނުމިން ބެލުމަކީ މީހެއްގެ ގައިގައި ކޮވިޑް-19 ހުރިތޯ ބެލުމަށް ހެދުމަށް އެންމެ ރަނގަޅު ޓެސްޓެއް ނޫނެވެ. އަދި ގިނަ ފަހަރަށް މި ނަތީޖާ އެންމެ ރަނގަޅު ނޫންކަން ވެސް ވަނީ ފާހަގަ ކޮށްފައެވެ.
Ads by STO
