މާލެ ސަރަހައްދުގެ ބަހުގެ ޚިދުމަތް ދިނުން އެމްޓީސީސީއާ ހަވާލުކުރުމުގެ ވިސްނުން ގެންގުޅެން : ރައީސް
މާލެ ސަރަހައްދުގެ އެއްގަމު ދަތުރުފަތުރުގެ ހިދުމަތަކަށް ހެޔޮ ބަދަލުތަކެއް ގެނައުމުގެ ގޮތުން މި ސަރަޙައްދުގެ ބަހުގެ ހިދުމަތް ދިނުން އެމްޓީސީސީއާ ހަވާލުކުރަން ސަރުކާރުން ވިސްނަން ފަށާފައިވާ ކަމަށް ރައީސުލްޖުމްހުރިއްޔާ އިބްރާހިމް މުހައްމަދު ޞާލިހް ވިދާޅުވެއްޖެއެވެ.
ރައީސް މިހެން ވިދާޅުވެފައިވަނީ އެމްޓީސީސީއަށް 40 އަހަރު ފުރުމުގެ މުނާސަބަތުގައި ސަންގުޓީވީން ދެއްކި "ކާމިޔާބު 40" ޕްރޮގްރާމްގައި ވާހަކަ ދައްކަވަމުންނެވެ.
ރައީސް ވިދާޅުވީ، މާލެ ސަރަހައްދުގެ އެއްގަމު ދަތުރުފަތުރުގެ ހިދުމަތަކަށް ހެޔޮ ބަދަލުތަކެއް ގެނައުމުގެ ގޮތުން މި ސަރަޙައްދުގެ ބަހުގެ ހިދުމަތް ދިނުން އެމްޓީސީސީއާ ހަވާލު ކޮށްގެން ކުރިއަށް ގެންދިއުމުގެ ވިސްނުން ސަރުކާރުން ގެންގުޅުއްވާ ކަމަށެވެ. މާލެ ސަރަހައްދުގައި މިހާރު ބަހުގެ ހިދުމަތް ދެމުންދަނީ އެމްޕީއެލްގެ ފަރާތުންނެވެ. މީގެ އިތުރުން އެމްޓީސީސީގެ ހިންގުންތެރިކަމާއި މާލީ ރޭވުންތެރިކަން ވަރަށް ބޮޑަށް ހަރުދަނާވެފައިވާ ކަމަށާއި އަސާސީ ހިދުމަތްތައް ފޯރުކޮށްދިނުމަށް ސަރުކާރުން ކަނޑައަޅާފައިވާ ސިޔާސަތު ތަންފީޒު ކުރުމުގައި އެމްޓީސީސީން އަދާކުރަމުން އަންނަނީ ނަމޫނާ ދައުރެއް ކަމަށް ވެސް ރައީސް ވިދާޅުވިއެވެ.
ހަމައެހެންމެ ރައްޔިތުންގެ އަސާސީ ބޭނުންތަކާ ގުޅިފައިވާ ވަރަށް ގިނަ ހިދުމަތްތައް އެމްޓީސީސީއިން މިހާރު ދެމުން އަންނަ ކަމަށް ރައީސް ފާހަގަ ކުރެއްވިއެވެ.
Ads by STO
