ކަރަންޓީނު ނުވެ ރަށްރަށަށް ދެވޭނީ ފުލުހުންގެ ހުއްދަ ހޯދައިގެން
ކޮންމެހެން ދޭން ޖެހޭ ޚިދުމަތެއް ދިނުމަށް، ކޮވިޑް-19 ފެތުރިފައިވާ ރަށަކުން އެހެން ރަށަކަށް ކަރަންޓީނު ނުވާ ގޮތަށް ކުރުމުއްދަތަކަށް ދެވޭނީ ފުލުހުންގެ ހުއްދައާ އެކުގައި ކަަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނެފި އެވެ.
އެޗްޕީއޭ އިން މިއަދު އާއްމުކުރި އުސޫލުގައި ބުނެފައިވަނީ ކަރަންޓީނު ނުވެ ރަށްރަަަަށަށް ދާ މީހުން ފުލުހުންގެ ހާއްސަ ހުއްދައެއް ހޯދަން ހުށަހަޅަން ޖެހޭ ކަމަށެވެ. އެގޮތުން ފުލުހުންނަށް ހުއްދައެއް އެދި އީމެއިލް ކުރަން ޖެހޭ ކަމަށާއި އީއޯސީއަށް ވެސް މެއިލް ކުރަން ކުރަން ޖެހޭ ކަމަށް އެއުސޫލުގައި ބަޔާން ކޮށްފައިވެއެވެ. އަދި ހުއްދައަށް އެދި ފުލުހަށާއި، ހުއްދަ ދިނުމުގައި އީއޯސީ މެއިލްއަށާއި، ދަތުރު ކުރުމަށް އެދިފައިވާ ރަށެއްގެ ކައުންސިލަށް ކޮޕީ ކުރަން ވާނެ ކަމަށްވެސް އެޗްޕީއޭ އިން ބުނެފައިވެއެވެ.
އެގޮތުން ފުލުހުންނަށް އީމެއިލް ކުރަން ޖެހޭނީ [email protected] އަށެވެ. އަދި އީއޯސީއަށް އީމެއިލް ކުރަން ޖެހޭނީ [email protected] އަށެވެ.
އެޗްޕީއޭގެ އެ އުސޫލުގައިވާގޮތުން އެ ހުއްދައަށް އެދި ހުށަހަޅަން ޖެހޭނީ އެ މުއައްސަސާއެއްގެ ފަރާތުންނެވެ. އެއެޖެންސީން ބުނެފައި ވަނީ އެ ހުއްދަ ދޭނީ ކޭބަލް އަދި މީޑިއާ ނެޓްވާރކްގެ ޚިދުމަތްތައް ދޭ ފަރާތްތަކަށާއި، ބޭންކުގެ ޚިދުމަތްތައް ފަރާތްތަކަށާއި ވޯޓަރ ސަޕްލައި، ކަރަންޓުފަދަ ޔުޓިލިޓީ ޚިދުމަތްތައް ދޭ ފަރާތްތަކަށާއި، ޞިއްޙީ ޚިދުމަތްދޭ ތަންތަނުގެ ކަންތައްތައް ބެލުމާއި ވަގުތީ ގޮތުން ދޭންޖެހޭ ޚިދުމަތްތައް ދޭ ފަރާތްތަކުގެ އިތުރުން މެއިންޓެނަންސް މަސައްކަތްތައް ކުރާ ފަރާތްތަކަށާއި، ސަރުކާރުންނާއި އަމިއްލަ ފަރާތްތަކުން ރަށްރަށުގައި ހިންގާ ޕްރޮޖެކްޓް މަސައްކަތް ކުރާ ފަރާތްތަކާއި މިނޫން ވެސް އާންމު ޚިދުމަތްތަކާގުޅޭ އެހެނިހެން މަސައްކަތްތައް ކުރާ ފަރާތްތަކަށް ކަމަށެވެ.
Ads by STO
