ހިތުގެ ބައްޔެއް ޖެހިގެން ސުޝާންތުގެ ބައްޕަ ހޮސްޕިޓަލުގައި އެޑްމިޓު ކޮށްފި
ބޮލީވުޑްގެ ފިލްމީ ތަރި ސުޝާންތު ސިންގު ރާޖްޕޫތު ގެ ބައްޕަ ކޭކޭ ސިންގް ހޮސްޕިޓަލުގައި އެޑްމިޓު ކޮށްފިއެވެ.
އެނގިފައިވާ ގޮތުގައި ކޭކޭ ސިންގް އެޑްމިޓު ކޮށްފައިވަނީ ހިތުގެ ބައްޔަކާ ގުޅިގެން މިދިޔަ ހޮނިިހިރު ދުވަހުގައެވެ. އޭޝިއަން ހޮސްޕިޓަލުގައި އޭނާ އެޑްމިޓު ކުރިއިރު، މިހާރު ސުޝާންތުގެ ބައްޕަ ގެ ހާލު ރަނގަޅުވަމުން އަންނަ ކަމަށް ވެސް ރިޕޯޓުތަކުން ބުނެއެވެ.
ކޭކޭ ސިންގް ހޮސްޕިޓަަލުގައި އެޑްމިޓު ކޮށްފައި އޮއްވާ، ސުޝާންތުގެ ދެ ދައްތައާއެކު ނަގާފައިވާ ފޮޓޯއެއް މިހާރު މީސް މީޑިއާ ގައި ދަނީ ދައުރު ވަމުންނެވެ. ގިނަ ބަޔަކު ވަނީ ކޭކޭ ސިންގަށް އަވަސް ޝިފާއެއް ލިބުމަށް އެދި ކޮމެންޓް ކޮށްފައެވެ.
ސުޝާންތު މަރުވީ މިއަހަރުގެ ޖޫން މަހުގެ 14 ވަނަ ދުވަހުގައެވެ. އޭނާ އަމިއްލައަށް މަރުވެފައި ހުއްޓާ ފެނިފައިވަނީ ބަންޑްރާ ގައި އޭނާ ދިރިއުޅޭ ގޭގައެވެ.
ސުޝާންތު މަރުވީ އަމިއްލައަށް ކަމަށް ޕޯސްޓު މޯޓަމް ރިޕޯޓުތަކުން ބުނި ކަމުގައި ވިޔަސް އޭނާ އަކީ އަމިއްލައަށް މަރުވާނެ މީހެއް ނޫން ކަމަށާއި ސުޝާންތު މަރުވާން ބަޔަކު މަޖުބޫރުކުރީ ނުވަތަ މަރާލީ ކަމަށް އެއާއިލާއާއި ސުޝާންތުގެ ގާތް މީހުން ބުނެފައިވެއެވެ.
އެހެންކަމުން އޭނާ ގެ މަރުގެ ތަހުގީގު ކޮށްދިނުމަށް އެއާއިލާ އިން މައްސަލަ ހުށަހެޅި ފަހުން، އެތަހުގީގުގެ ތެރެއިން ހާމަވެފައިވަނީ އޭނާއަކީ މަސްތުވާތަކެތި ބޭނުން ކުރި މީހެއް ކަމަށާއި އެކަމުގައި ސުޝާންތަށް އޭނާގެ ލޯބިވެރިޔާ ރިއާ ޗަކްރަބަޓީ ވެސް އެހީވި ކަމަށެވެ.
