އަންނައުނު ގަންނަ ގޮތަށް ނުދޮވެ ލަނީ ކޮންބައެއް؟ ތިޔައީ އަދި އެންމެ ރަނގަޅު ގޮތެއް ނޫން
ރީތި އަންނައުނެއް ގަތުމަށްފަހު، ކޮންމެ މީހަކު ވެސް ބޭނުން ވަނީ އެ އެއްޗެއް ވީ އެންމެ އަވަހަކަށް ލާށެވެ. އެ އަންނައުނެއް ދޮވެގެން ލުމަށް ވެސް ކެތްތެރިކަމެއް ހުންނަނީ މަދުބައެއްގެއޭ ބުނުމަކީ ދޮގަކަށް ނުވާނެއެވެ. އަދި ބައެއް ފަހަަރަށް ކޮންމެވެސް ހަފްލާއަކަށް ނުވަތަ ހާއްސަ ދުވަހަކަށް ވަކި ކުލައެއްގެ އެއްޗެއް ގަންނަން ޖެހުމުން ވަގުތު ޖެހެން ވަރަށް ކައިރި ވުމުން ގޮސް ގަނެލާ ތަން ފެނެއެވެ. އަދި އެތަނަކަށް ދިއުމުގެ ކުރިން އެ އަންނައުނު ދޮންނާކަށް ވަގުތެއް ވެސް ނުލިބެއެވެ.
ކޮންމެއަކަސް މިއީ ވަރަށް ގިނަ ބަޔަކު އުފައްދާ ސުވާލެކެވެ. އަންނައުނު ގަންނަ ގޮތަށް ނުދޮވެ ލުމަކީ އެންމެ ރަނގަޅު ގޮތްތޯއެވެ. އެންމެ ސާފުތާހިރު ގޮތްތޯއެވެ. ހަގީގަތަށް ބުނާ ނަމަ އެންމެ ފުރަތަމަ އަންނައުނު ގަންނަ ގޮތަށް ވެސް ލާން ޖެހޭނީ ދޮންނަ މެޝިނަށެވެ. ނުވަތަ ދާ ވަށިގަނޑަށެވެ.
ސަބަބަކީ ހެއްޔެވެ؟ ފުރަތަމަ ސަަބަބަކީ އެންމެންނަށް ވެސް އެނގޭ ސަބަބެކެވެ. ފިހާރައަކުން ގަންނަ އަންނައުނަކީ ކިތައް މީހުން އޭގައި އަތްލާފައިވާ އެއްޗެއް ކަން އެކަކަށް ވެސް ނޭނގޭނެއެވެ. އަދި އެތަނަށް ގޮސް ކިތައް މީހުން އެ ގަތުމަށްޓަކައި ޗޭންޖިންގ ރޫމުގައި ލައިފައިވާ އެއްޗެއް ކަމެއް ވެސް އެކަަކަށް ވެސް ނޭނގޭނެއެވެ. އަދި އެގޮތަށް މީހުން އަތްލާ އުޅުމުގެ ތެރޭގައި ފިހާރައިގެ ތަޅުން މައްޗަށް ވެއްޓި ހަޑިވުން ފަދަ ކަންކަން ކުރިމަތިވެދާނެއެވެ.
އަންނައުނު ލުމުގެ ކުރިން ދޮންނަންވީ އެންމެ ބޮޑު އެއް ސަބަބަކީ އަންނައުނު އުފައްދާ ކުންފުނިތަކުން އެ ތަކެތި އުފެއްދުމުގައި ގިނަ އަދަދެއްގެ ކެމިކަލް ބޭނުން ކުރާތީއެވެ. އެ ކެމިކަލްތައް ބޭނުން ކުރާ ސަބަބަކީ އެތަކެތި އުފައްދާ ފެކްޓްރީތަކުން ފިހާރަތަކަށް ދިއުމާ ދެމެދު ހޭދަވާ ވަގުތުގައި އެތަކެތި ހަލާކުވުމުން ރައްކާތެރި ކުރުމަށެވެ. އަދި ވިހަ ފަދަ އެއްޗެހިން މި އަންނައުނުތައް ސަލާމަތް ކުރުމަށެވެ. މިފަދަ ކެމިކަލްތަކުގެ ސަބަބުން ހަންގަނޑަށް ނޭދެވޭ އަސަރުތަކެއް ކޮށްފާނެެއެވެ.
ހަން ފޮޅުމާއި ހަންގަނޑުގައި ފާޑުފާޑުގެ ބިހި ނެގުންފަދަ ކަންކަމަކީ ގިނަ ބަޔަކު ތަހައްމަލު ކުރާ ކަންކަމެވެ. އައު އަންނައުނެއް ނުދޮވެ ލުމުން ގައިކަހާ އުނދަގޫ ތަކާ ކުރިމަތިވާ ގޮތް ނުވޭ ހެއްޔެވެ؟ އަދި އަންނައުނުގައި ކެމިކަލް ވަސް ފަދަ ވަހެއް ހުރުމަކީ ވެސް އެކަށީގެން ވާ ކަމެކެވެ.
ކުޑަކުދިންގެ އަންނައުނު ކޮންމެހެން ވެސް ދޮންނަން ވާނެ
ތިބާ ހަންގަނޑަކީ އެހާ ނާޒުކު އެއްޗަކަށް ނުވެދާނެއެވެ. އަދި މަތީގައި މި ބުނެވުނު ކަންތައްތަކާ ތިބާ މާ ބޮޑަށް އަޅާ ނުލި ނަމަވެސް ތިބާގެ ދަރިފުޅު ނުވަތަ ތިބާގެ ކޮއްކޮ އަކަށް އަންނައުނު ގަންނަ ގޮތަށް ނުދޮވެ ނުލައްވާށެވެ. ސަބަބަކީ އެ އަންނައުނުގައި ހުންނަ ކެމިކަލްތަކުގެ ސަބަބުން ކުޑަކުދިންނަށް އުނދަގޫ ތަކާ ކުރިމަތިވާނެއެވެ. އަދި އެކުދިންގެ ހަންގަނޑަށް އޭގެ ސަބަބުން އަސަރު ކުރާ ގޮތް ވުމެވެ. ބޮޑެތި މީީހުންނަށް އެ އުނދަގޫ ތަކަށް ކެތްކުރެވުނު ނަމަވެސް ކުޑަކުދިންނަށް ކެތްކުރަން އުނދަގޫ ވާނެއެވެ.
