ކޮވިޑް ބައްޔަކީ ވޭނެއް އަދި އެހެންމެ އިމްތިހާނެއް، ރައްކާތެރިވެ ތިބުން ބުއްދިވެރި: ޠާރިޤް ޖަމީލު
ލާހޯރް- ޕާކިސްތާނުގެ މަޝްހޫރު ދީނީ ޢިލްމުވެރިއެއް ކަމަށްވާ ޠާރިޤް ޖަމީލް ކޮވިޑް-19 އަށް ފައްސިވެ، ބަލިން ފަސޭޙަ ވުމަށްފަހު ފުރަތަމަ ފަހަރަށް އާއްމުންނާ ވާހަކަ ދައްކަވާ މެސެޖެއް ދެއްވައިފިއެވެ.
ޠާރިޤް ޖަމީލު ކުރެއްވި ވީޑިއޯ ގައި ވިދާޅުވެފައި ވަނީ ކޮވިޑް-19 ނުވަތަ ކޮރޯނާ ވައިރަސްއާ ބެހޭގޮތުން މީގެ ކުރިން ވެސް ވާހަކަ ދެއްކެވި ކަމަށާއި ނަމަވެސް އެއިރު މިބައްޔާ ބެހޭގޮތުން އެވަރުގެ މައުލޫމާތެއް ލިބިފައިނުވާ ކަމަށެވެ.
ދީނީ ޢިލްމުވެރިޔާ ޠާރިޤް، ކޮވިޑް ބަލި ސިފަ ކުރައްވާފައި ވަނީ ބޮޑު ވޭނެއް އަދި އިމްތިހާނެއްގެ ގޮތުގައެވެ. އަދި އެދުވަސްވަރު ވަރަށް ބޮޑަށް ކެތްތެރިވާން ޖެހުނު ކަމަށް ވެސް ވިދާޅުވިއެވެ.
"ކޮވިޑަށް ފައްސިވެ، ބަލިން ފަރުވާ ލިބުމަށް އަހަރެން ހޮސްޕިޓަލުގައި 10 ދުވަސް ވަންދެން އޮތީމެވެ. މާތް ﷲ ގެ އިރާދަފުޅާއެކު އަހަންނަށް މިވަނީ މިބަލިން ޝިފާ ލިބިފައެވެ. ނަމަވެސް މިބަލީގައި އެތައް ބަޔަކު ދުނިޔެއިން ވަކިވެގެން ދިޔަތަން ވެސް އަހަންނަށް ވަނީ ފެނިފައެވެ" ޠާރިޤް ޖަމީލު ގެ ވާހަކަފުޅުގައި ވިދާޅުވެފައިވެއެވެ.
އެވީޑީއޯ ގައި އެމަނިކުފާނު އިތުރަށް ވިދާޅުވީ ބަލިން ފަސޭހަވީ ނަމަވެސް އެމަނިކުފާނަށް އަދިވެސް މާގިނައިރު ވާހަކަ ނުދެއްކޭ ކަމަށާއި އަދިވެސް ވަރަށް ބޮޑަށް ވަރުބަލިކަން އިހުސާސް ކުރެވޭ ކަމަށެވެ. އެހެންކަމުން އެންމެން ވެސް މިބަލިން ރައްކާތެރިވެ ތިބުމަށާއި، އިޖުތިމާއީ ގައިދުރުކަން ބެހެއްޓުމަށް ސަމާލުކަން ދިނުމުގެ އިތުރުން މާސްކު އެޅުމަށާއި އަތް ދޮވެ ސެނިޓައިޒަރ ބޭނުން ކުރުމަށް ސަމާލުކަން ދިނުމަށް ވެސް ޠާރިޤް ޖަމީލު ވަނީ އިލްތިމާސް ކުރައްވާފައެވެ.
ޠާރިޤް ޖަމީލު ކޮވިޑް-19 އަށް ފައްސިވީ މިމަހުގެ 13 ވަނަ ދުވަހުގައެވެ. އޭގެ ފަސް ދުވަސް ފަހުން ނެގި ސާމްޕަލުން ނަތީޖާ ނައްސި ކަމަށް ދެއްކި ނަމަވެސް ހޮސްޕިޓަލުން އެމަނިކުފާނު ދޫކޮށްލާފައި ވަނީ އިއްޔެގެ ވަގުތެއްގައެވެ.
Ads by STO
