ކައިވެނި ކްލަސްޓާ: ޖުމްލަ 62 މީހުން ފައްސިވެއްޖެ
މިމަހުގެ 20 ވަނަ ދުވަހު ޝީ ބިލްޑިންގ ގައި ބޭއްވި ކައިވެނި ހަފްލާގައި ބައިވެރިވެގެން ކޮވިޑް-19 އަށް ފައްސިވީމީހުންގެ އަދަދު 62 އަށް އަރައިފިއެވެ.
ކްލަސްޓާގައި އެންމެ ފުރަތަމަ ފައްސިވެފައިވަނީ 35 މީހުންނެވެ. ނަމަވެސް ފައްސިވި މީހުންގެ އަދަދު މިހާރު ވަނީ 62 އަށް އަރާފައެވެ.
އެޗްޕީއޭ އިން ބުނީ މި ކްލަސްޓާގައި ފުރަތަމަ މީހަކު ފައްސިވެފައި ވަނީ މިމަހުގެ 24 ވަނަ ދުވަހު ކަމަށާއި ޖެހިގެން އައި ދުވަހު އިތުރު 12 މީހުން ފައްސިވެފައިވާ ކަމަށެވެ. އަދި 26 ވަނަ ދުވަހު 21 މީހުން 27 ވަނަ ދުވަހު އަށް މީހުން ފައްސިވި ކަމަށް ވެސް އެޗްޕީއޭއިން ބުނެއެވެ.
ކައިވެނި ހަފްލާއަށް ހައިރިސްކް މީހުން ވެސް ގޮސްފައިވާ އިރު، ޕޮޒިޓިވް މީހުންގެ ތެރޭގައި ވެސް ހައި ރިސްކް ހަތަރު މީހަކު ހިމެނެއެވެ.
ކައިވެނި ޕާޓީއަށް ދިޔަ އެއްވެސް މީހަކަށް އެޗްޕީއޭ އިން މިހާތަނަށް ގުޅާފައި ނުވާނަމަ އެޗްޕީއޭގެ ހޮޓްލައިން 1676 ނަމްބަރު ފޯނަށް ގުޅައި މައުލޫމާތު ހިއްސާކުރުމަށް ވެސް ޑރ. ނަޒްލާ ވަނީ އެދިވަޑައިގެންފައެވެ.
