ރައީސް ޞާލިޙުގެ އުފަން ދުވަސް "އޮޅުން ބޮޅުން" ގަނޑަކަށް

ކޮންމެ އަހަރެއްގެ ވެސް ޖެނުއަރީ މަހުގެ 1 ވަނަ ދުވަހަކީ އެތައް ބަޔަކު އެކިމީހުންނަށް އުފަން ދުވަހުގެ ތަހުނިޔާ ފޮނުވާ ދުވަހެއްކަން ފާހަގަ ކުރެވެއެވެ. އެގޮތުން މިދުވަހު ހަގީގަތުގައި ވެސް އުފަންވެފައިވާ މީހުންނާއި، އުފަން ދުވަސް ކުރިން ނޭނގުމުގެ ސަބަބުން އައިޑީކާޑުގައި މިދުވަސް އުފަން ދުވަހުގެ ގޮތުގައި ޖަހާފައިވާ މީހުން ހިމެނެއެވެ. އެހެންކަމުން ކޮންމެ ޖެނުއަރީ މަހެއްގެ އެއްވަނަ ދުވަހު އުފަން ދުވަހުގެ ތަހުނިޔާ އެކަކު އަނެކަކަށް ފޮނުވުމުން، ހަގީގަތުގައި ވެސް އެއީ މިތާރީޚުގައި އުފަންވި މީހުންތޯ ސުވާލު އުފެދެއެވެ.

Ads by STELCO

ޖެނުއަރީ އެކެއްގައި އުފަންވީ މީހުންނާއި އެމީހުންނަށް ކިޔާފައިވާ ތަހުނިޔާތަކަށް ބަލާއިރު، މިއަދު މިވަނީ ގިނަ ބަޔަކަށް ވަރަށް ހައިރާންކަމެއް ލިބުނު ކަމެއް މީސްމީޑިއާގައި ހިނގާފައެވެ. ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުޙައްމަދު ނަޝީދު ވަނީ ރާއްޖޭގެ ރައީސުލް ޖުމްހޫރިއްޔާ އިބްރާހިމް މުޙައްމަދު ޞާލިޙަށް އުފަންދުވަހުގެ ތަހުނިޔާ ފޮނުއްވާފައެވެ.

ރައީސް ނަޝީދަކީ، ރައީސް ޞާލިޙުގެ އެންމެ އަރިސް އެއް ބޭފުޅާ ކަމަށްވެފައި، ދެ ބޭފުޅުންގެ މެދުގައި ޒަމާންވީ އެކުވެރިކަން ވެސް އޮތުމުން، އެމަނިކުފާނަށް ރައީސް ޞާލިޙުގެ އުފަން ދުވަސް އޮޅިވަޑައިގެންފާނެ ކަމަށް ގިނަ ބަޔަކު ޤަބޫލެއް ނުކުރެއެވެ.

ނަމަވެސް ރައީސް ޞޯލިޙުގެ އަސްލު އުފަން ދުވަހަށް ބަލާއިރު ވަނީ ބޮޑު އޮޅުން ބޮޅުން ގަނޑެއް އުފެދިފައެވެ. ރައީސް ނަޝީދު ވެސް މިއަދު ތަހުނިޔާ ކިޔާފައިވާއިރު އެނގިފައިވާ ގޮތުގައި އާއިލާއިން ވެސް ވަނީ މިއަދަކީ ރައީސް ޞާލިޙުގެ އުފަން ދުވަސްކަމަށް ނިންމާ މިދުވަސް ފާހަގަ ވެސް ކުރައްވާފައެވެ.

ނަމަވެސް ގޫގްލް އިން ހޯދައިގެން ބަލާލާއިރު ވިކިޕީޑިއާ އިން ރައީސް ޞާލިޙުގެ އުފަން ދުވަސް ކަމަށް ދައްކަނީ 1962 ވަނަ އަހަރުގެ މާރޗް މަހުގެ 1 ވަނަ ދުވަހެވެ. އަދި އިލެކްޝަންސް ކޮމިޝަނުން އާއްމުކޮށްފައިވާ މައުލޫމާތަށް ބަލާއިރު އެމަނިކުފާނުގެ އައިޑީކާޑު ނަންބަރާއެކު، އުފަން ދުވަސް ކަމުގައި ޖަހާފައިވަނީ ވެސް ހަމަ އެތާރީޚެވެ.

ކޮންމެއަކަސް ރައީސް އިބްރާހިމް މުޙައްމަދު ޞާލިޙުގެ އުފަން ދުވަސް މިވަނީ އެތައް ބަޔަކަށް އޮޅިފައެވެ. ދިވެހި ރައްޔިތުންގެ އުންމީދަކީ ރައީސް ޞާލިޙު އުފަންވެ ވަޑައިގެންނެވި "އަސްލު ދުވަސް" ލަސްތަކެއްނުވެ ހާމަ ކޮށްދެއްވުމެވެ.