ދޮގު ހެދުން: ގިނަ ބަޔަކަށް ނޭނގި ނަމަވެސް ކުރެވޭ ނުރަނގަޅު ކަމެއް
ސަމާސާއަކަށް ނަމަވެސް ދޮގެއް ނުހަދާށޭ ބުނާ އަޑު އަޅުގަނޑުމެން ވަރަށް ގިނައިން އަހަމުއެވެ. ކިތަންމެ ކުޑަކުޑަ ކަމަކަށް ނަމަވެސް ދޮގެއް ހެދުމަކީ ރަނގަޅު ކަމެއް ނޫނެވެ. އެހެން ނަމަވެސް އަޅުގަނޑުމެންގެ މި މުޖުތަމަޢުން ފެންނަނީ މިކަމުގެ އިދިކޮޅެވެ. ރައްޓެހިންނާ، ތިމާ މަސައްކަތް ކުރާ އޮފީހުގެ އިތުރުން ތިމާގެ އަމިއްލަ މައިންބަފައިންނަށް ވެސް ދޮގު ހަދާ މީހުން މަދެއް ނޫނެވެ.
ސުވާލަކީ ދޮގު ހަދައިގެން ލިބޭ ފައިދާއަކީ ކޮބައި ހެއްޔެވެ؟ ދުނިޔޭގެ މި ވަގުތީ ފާލަމުގައި ތިބާ ހަދާ ކޮންމެ ދޮގަކުން ވެސް ތިބާއަށް ލިބިގެން ދާނީ ވަގުތީ ހިތްހަމަޖެހުމާއި ވަގުތީ ސަލާމަތްތެރިކަމެވެ. އެންމެ ފަހަރެއް ކަމަށް ތިބާ ހެދި ދޮގު، ފޫބެއްދުމަށްޓަކައި ތިބާ ދޮގަކަށް ފަހު ދޮގެއް ހަދަން މަޖުބޫރު ވާނެއެވެ.
އެހެން ނަމަވެސް ދަންނަވަންތޯއެވެ؟ ދޮގަކީ ފުލެއް އޮތް އެއްޗެއް ނޫނެވެ. އެހެނީ ތިބާ ކިތަންމެ ވަރަކަށް މަސައްކަތް ކުރިކަމުގައި ވީނަމަވެސް ތިބާ ހެދި ދޮގަކީ ފޫބެއްދޭނެ އެއްޗެއް ނޫނެވެ. އެކަމުގެ ސަބަބުން ތިބާގެ ހެޔޮ ޢަމަލުތަކަށް ވުރެ ތިބާގެ ދޮގުތައް ގިނަވުމަަށް މަގުފަހިވެ ދުނިޔެއާއި އާޚިރަތް ވެސް އަބާއްޖަވެރިވެއެވެ.
ދޮގަކީ ދެމީހެއްގެ ދެމެދު ފިތުނަ އުފެދުމަށް ކުރިމަތިވާ އެންމެ ބޮޑު އެއް ސަބަބެވެ. އެކަމުގެ ސަބަބުން މިއަދު އެތައް އާއިލީ ގުޅުމެއް ކެނޑިފައިވާއިރު، އެތައް ރައްޓެހިންނެއް މިއަދު ވަނީ ބީރައްޓެހިންނަށް ބަދަލުވެ ގޮސްފައެވެ. ދޮގަކީ އެހާވެސް ބާރުގަދަ އަދި އެހާމެ ނުރައްކާތެރި ހަތިޔާރެކެވެ.
މިސާލަކަށް ތިމާއަށް މީހަކު ދޮގު ހަދައިފިކަން ތިމާއަށް ފަޅާ އަރައިފިނަމަ ތިބާ އެކަމާ ދެރަ ނުވާނެ ހެއްޔެވެ؟ އެކަމާ ހިތާމަ ނުކުރާނެ ހެއްޔެވެ؟ ތިބާ އޭނައާމެދު ކުރި އިތުބާރަށް ކުޑަ ވެސް ކިލަނބުކަމެއް ނާންނާނެ ހެއްޔެވެ؟ އާދޭހެވެ. އެގުޅުން ދެމިއޮތް ކަމުގައި ވީނަމަވެސް ގުޅުން ހީނަރުވެ ކުރިން ކުރި އިތުބާރު އަނބުރާ ހޯދުމަށް އުނދަގޫ ވާނެއެވެ. އެހެނީ ދޮގު ހެދުމަކީ ނުބައި އަދި އެހާމެ ވަރުގަދަ ހަތިޔާރަކީއެވެ.
