ފޮނަދޫ ކުލަސްޓަރ: 59 ކޮންޓެކްޓުން ، 10 މީހުންނަކީ ހައި ރިސްކް މީހުން: އެޗްޕީއޭ
ލ. ފޮނަދޫގައި ކޮވިޑަށް ފައްސިވި ފަރާތްތަކުގެ ކޮންޓެކްޓުންގެ ގޮތުގައި 59 މީހުން ތިބި ކަމަށާއި އޭގެ ތެރޭގައި ހައި ރިސްކު 10 މީހުން ތިބި ކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ)އިން ވިދާޅުވެއްޖެއެވެ.
މިރޭ ބޭއްވި ނޫސްވެރިންގެ ބައްދަލުވުމުގައި ހެލްތު އިމަޖެންސީ އޮޕަރޭޝަންސް ސެންޓަރު (އެޗްއީއޯސީ)ގެ ހެޑް އޮފް ކޮންޓެކްޓް ޓްރޭސިން ކްލާސްޓާ އިބްރާހިމް ނިޒާމް ވިދާޅުވީ ފޮނަދޫ ކްލަސްޓާ އާ ގުޅިގެން، ކޮންޓެކްޓް ޓްރޭސިންގެ މަސައްކަތް ކުރުމުން ޑައިރެކްޓު ކޮންޓެކްޓުންގެ ގޮތުގައި 59 މީހަކު ފާހަގަކުރެވިފައިވާ ކަމަށެވެ.
އަދި އޭގެ ތެރޭގައި ކޮވިޑުގެ ނުރައްކާ ބޮޑު ނުވަތަ ހައި ރިސްކު 10 ފަރާތެއް ވެސް ހިމެނޭ ކަމަށް އޭނާ ވިދާޅުވިއެވެ.
ގއ.ދެއްވަދޫން ލ.ފޮނަދޫއަށް ދަތުރު ކުރި 4 މީހަކު ކޮވިޑަށް ފައްސިވެފައި ވަނީ އިއްޔެއެވެ. އެއާއެކު ފޮނަދޫ އަދި އެރަށާ އެއްފަސްކޮށް އޮންނަ ގަމަށް އަރާ ފޭބުން ވަނީ މަނާކޮށްފައެވެ. އަދި ޑައިރެކްޓް ކޮންޓެކްވި މީހުން ދިރިއުޅޭ ފޮނަދޫގެ 22 ގެއެއް ވަނީ ކަރަންޓީން ކޮށްފައެވެ.
މި ކްލަސްޓާ އާ ގުޅިގެން މިހާތަނަށް 56 ސާމްޕަލެއް ނަގާފައިވާއިރު އޭގެ ތެރެއިން 14 ސާމްޕަލް އެއް މިހާތަނަށް ނައްސިވެފައިވާއިރު، 38 ސާމްޕަލް ގެ ނަތީޖާ އަދި ނުލިބެއެވެ.
މަޢުލޫމާތު ލިބިފައިވާ ގޮތުގައި ކޮވިޑަށް ފައްސިވި މީހާ، ފޮނަދޫގައި ކުރިޔަށް ދިޔަ ޖަނާޒާއެއްގައި ވަނީ ބައިވެރިވެފައެވެ.
ކޮންޓެކްޓް ޓްރޭސިންގ ހެދުމުގެ މަސައްކަތް މިހާރު ފޮނަދޫ ސިއްހީ މަރުކަޒުން ކުރިޔަށް ގެންދާއިރު، ކޮވިޑް-19 ޖެހުނު ފަރާތާ ކޮންޓެކްޓްވި ފަރާތެއްވާނަމަ، 6800019 ނުވަތަ 6800017 ނަންބަރު ފޯނަށް ގުޅުއްވާ މަޢުލޫމާތު ހިއްސާ ކުރެއްވުމަށް އެފަރާތުން އެދެއެވެ.
