އޭ ނިކަމެތި އިންސާނާއެވެ. މަރު އައިސް ތިބާއާ ބައްދަލު ކުރާނެ ވަގުތަކަށް ތައްޔާރު ހެއްޔެވެ؟
ބަދަލުވަމުން އަންނަ ދުނިޔޭގައި ކޮންމެ ދުވަހަކު ވެސް ގާތްގަނޑަކަށް 150،000 މީހުން މަރުވާ ކަމުގައި ތަފާސް ހިސާބުތަކުން ދައްކައެވެ. ކުއްލި މަރާއި، އަދި ބަލި ދާންމަތީގައި އެތައް ދުވަސްތަކެއް ވޭނުގައި ތަހައްމަލު ކުރުމަށް ފަހުގައެވެ. ވިސްނާލަންވީ ކަމަކީ އެމީހުން ވެސް މާދަމާއަށް ކުރަން ތައްޔާރަށް ބަހައްޓައިފައި ހުރި އެތައް ކަމެއް އެބަހުރި ކަމެވެ. އެހެން ނަމަވެސް އެމީހުންނާ އެމީހުންގެ މަރު އައިސް ބައްދަލު ކުރަނީ ނޭނގި ތިއްބާއެވެ.
ސުވާލަކީ ތިބާ ތިހުރީ ތިބާގެ މަރު އައިސް ތިބާއާ ބައްދަލު ކުރާނެ ވަގުތަށް ތައްޔާރަށް ހެއްޔެވެ؟ މިއަދު އެތައް ކަމެއް މާދަމާއަށް ފަސްކޮށް، ވަގުތީ އުފާ ހޯދުމުގަައި އުޅެވިދާނެއެވެ. އެހެންނަމަވެސް ތިބާގެ މަރު އައިސް ތިބާއާ ބައްދަލު ކުރާހިނދު އެކަން ތިބާއަށް ފަސްކޮށްލެވޭނެ އެއްވެސް ގޮތެއް ނުވެއެވެ. އެހެންކަމުން ތިބާގެ ނިމުން އަންނާނެ ވަގުތާއި އަންނާނެ ގޮތެއް ނޭނގި ހުރެ، ދުނިޔޭގެ މަޖަލާއި އަރާމާއި ލައްޒަތުގައި ތިބާގެ ނަފްސު އޮޔާ ދުއްވައި ނުލާށެވެ.
ކުއްލި މަރުތައް އިންތިހާއަށް ގިނަވެފައި ވާއިރު، މާދަމާ ޓީވީތަކުން ކަށުނަމާދަށް ގޮވާލާނީ ތިބާގެ މައްޗަށް ކުރެވޭ ކަށުނަމާދު ކަމެއް ފަހެ އެނގެނީ ވެސް ކާކަށް ހެއްޔެވެ؟ މިއަދު ތިބާ ދިރި ދުނިޔޭގައި އެހެންމީހުންގެ މައްޗަށް ކުރެވޭ ކަށުނަމާދުތަކުން ތިބާ ޢިބުރަތް ލިބިގަންނާށެވެ. އެއިން ކޮންމެ މަރަކީ ވެސް ތިބާގެ ނިމުން ތިބާއާ ގާތް ވަމުން އަންނަ ކަން ދައްކުވައިދޭ ނިޝާނެކެވެ. ތިބާގެ ،މަރުމަތިން ހަނދުމަ ކުރުމަށް ތިބާއަށް ދެވޭ "ރިމައިންޑާ" އެކެވެ.
އެހެންނަމަވެސް ހަގީގަތުގައި މިއިން އެއްވެސް ކަމަކާ ދޭތެރޭ ތިބާ އެންމެ ފަހަރަކު ވެސް ވިސްނާލީމު ހެއްޔެވެ؟ ތިބާގެ އުޅުން އިސްލާހު ކޮށް ތިބާގެ ނިމުން ހަމަ ކޮންމެ ވަގުތަކު ވެސް އައިސްދާނެ ކަން ދަނެ އެކަމަށް ތައްޔާރުވާން އެއްވެސް ވަރަކަށް މަސައްކަތް ކުރަން ހެއްޔެވެ؟ ނޫނެކެވެ. އެދުވަސްވަރު ތިބާ ނަމާދު ކޮށްފާނެއެވެ. އެހެންނަމަވެސް އެ ހެޔޮ ޢަމަލު ކުރުންމަތީގައި ތިބާއަކަށް ސާބިތެއް ނުވެވެއެވެ. ތިބާގެ އީމާންތެރިކަން ވަރުގަދަ ވެގެން ނޫނީ ހެޔޮ ޢަމަލު ކުރުންމަތީގައި ތިބާއަށް ދެމިނުހުރެވޭނެކަން ގައިމެވެ.
އޭ މުސްލިމު އަޚުނުންނާއި އުޚުތުންނޭވެ. ވަގުތީ މި މަންޒިލުގައި ތިބާއަށް ތިޔަ ލިބޭ އަރާމާއި ހިތްހަމަޖެހުމާއި ލައްޒަތަކީ ވެސް ހަމަ ވަގުތީ އުފަލެވެ. ދާއިމަށް އޮތް މަންޒިލަކީ އާޚިރަތެވެ. އެދުވަހަށް ތިބާ މަސައްކަތް ކުރާށެވެ. އެދުވަހުން ލިބޭ އަރާމާއި އުފަލާ ހިތްހަމަ ޖެހުމަކީ ނިމުމެއް ނެތް އަދި ތިބާ ދުނިޔޭގައި ވެސް ނުލިބޭ ފަދަ ބޮޑު ހިތްހަމަ ޖެހުމާއި އުފަލެކެވެ. މާދަމާ ވެސް ތިބާ ކަށްވަޅަށް މަރުޙަބާ ކިޔަން ޖެހިދާނެއެވެ. ތިބާގެ ނިމުން އަންނާނެ ވަގުތަށް އަބަދުވެސް ތައްޔާރަށް ތިބެވޭތޯ ގަދައަޅައި މަސައްކަތް ކުރާށެވެ.
Ads by STO
