“ޑުޕަރ ފިފްޓީން” މަޅި ފުޓްސަލް ޗެލެންޖު: ލުއްޗާޒްގެ މައްޗަށް ކުރި ހޯދައި މަސްއޮޑި އޮރިޖިނަލްސް އަށް ރަނގަޅު ފެށުމެއް!
ޑުޕަރ ފިފްޓީން މަޅި ފުޓްސަލް ޗެލެންޖުގައި މިރޭ މަސްއޮޑި އޮރިޖިނަލްސް އާއި ލުއްޗާޒް ވާދަކުރި މެޗު 3-2 ގެ ނަތީޖާއަކުން ކާމިޔާބުކޮށް މަސްއޮޑި އޮރިޖިނަލްސް އިން މުބާރާތުގެ ފެށުން ރަނގަޅު ކޮށްފިއެވެ.
މެޗު ފަށައިގެން ދެ ޓީމުގެ ފަރާތުން ވެސް ނުރައްކާތެރި ހަމަަލާތަކެއް ބަދަލު ކުރަމުން ގެންދިޔަ އިރު، ދެޓީމުގެ ފަރާތުން ވެސް ފެނިގެން ދިޔައީ ފޯރިގަދަ ހަމަހަމަ ކުޅުމެކެވެ.
މި މެޗުގައި އެންމެ ފުރަތަމަ ގޯލެއް ޖަހައި ލީޑު ނެގީ، މަސްއޮޑި އޮރިޖިނަލްސްއިންނެވެ. މި ލަަނޑު އެ ޓީމަށް ކާމިޔާބު ކޮށްދިނީ، މަސްއޮޑި އޮރިޖިނަލްސްގެ ޖާރޒީ ނަންބަރު 7، ބަރާއު އެވެ. އޭނާ މިގޯލު ކާމިޔާބު ކުރި ކައިރިއަށް އައި ކުޅުންތެރިޔާ ކަޓުވާލުމަށް ފަހު، ލުއްޗާޒްގެ ޑީ އޭރިއާ ކައިރިންނެވެ، އަދި އޭގެ މާ ގިނަ އިރުތަކެއް ނުވެ އެ ޓީމުގެ ޖާރޒީ ނަންބަރު 9، ޝުޒެއިރު، ވަނީ އިތުރު ގޯލެއް ޖަހައި އެ ޓީމުގެ ލީޑު ފުޅާ ކޮށްދީފައެވެ.
މި މެޗުގައި ލުއްޗާޒްގެ ފުރަތަމަ ގޯލް ކާމިޔާބުކޮށްދިނީ، އެ ޓީމުގެ ޖާރޒީ ނަންބަރު 10، ހަސަން ސަލާހު އެވެ. މި ލަނޑު އޭނާ ޖެހީ ލިބުނު ހިލޭ ޖެހުމަކުންނެވެ. އަދި ލުއްޗާޒްގެ މި ގޯލަށް ފަހު، މަސްއޮޑި އޮރިޖިނަލްސްއާ ދެކޮޅަށް ލުއްޗާޒް އިން ގިނަ ހަމަލާތަކެއް ވަނީ އަމާޒުކޮށްފައި ވެއެވެ.
މެޗުގެ ފުރަތަމަ ހާފު ނިމިގެން ދިޔައީ 2-1 ގެ ނަތީޖާއަކުން މަސްއޮޑި އޮރިޖިނަލްސް ކުރީގައި އޮވެގެންނެވެ.
ދެވަނަ ހާފްގެ ކުޅުން ފެށުމާއެކު ލުއްޗާޒްގެ ފަރާތުން ފެންނަމުން ދިޔައީ ތަފާތު ކުޅުމެކެވެ، އެގޮތުން ލަނޑު ޖަހާނެ ގިނަ ފުރުސަތުތަކެއް ލުއްޗާޒްއިން ވަނި ހޯދައިފައެވެ. އެހެންނަމަވެސް ލުއްޗާޒްއަށް ލިބުނު ފުރުސަތުތަކުގެ ބޭނުން ނުހިފެނީސް މަސްއޮޑި އޮރިޖިނަލްސްގެ ޖާރޒީ ނަންބަރު 10، ކައިސަން އިތުރު ގޯލެއް ޖަހައި، މެޗުގެ ލީޑު މަސްއޮޑި އޮރިޖިނަލްސްއާ އެއްކޮޅަށް ވަނީ ފުޅާކޮށްފައެވެ.
މަސްއޮޑި އޮރިޖިނަލްސްގެ މިގޯލަށް ފަހު އަނެއްކާވެސް ލުއްޗާޒްއިން އިތުރު ގޯލެއް ޖަހައި މި ދެޓީމިގެ ދެމެދުގައި އޮތް ފަރަގު ކުޑަކުރިއެވެ. ލުއްޗާޒްއަށް މި ގޯލް ވެސް ކާމިޔާބު ކޮށްދިނީ އެޓީމުގެ ޖާރޒީ ނަންބަރު 10، ހަސަން ސޮލާހުއެވެ. ލުއްޗާޒްގެ މި ގޯލަށް ފަހުގައި ވެސް އެޓީމަށް ގިނަ ފުރުސަތުތަކެއް ވަނީ ލިބިގެން ގޮސްފައެވެ. އެހެންނަމަވެސް އެފުރުސަތު ތަކުގެ ބޭނުން ލުއްޗާޒް އަށް ނުހިފުނީ ފޮނުވި ހުރިހާ ހަމަލާއެއް ވެސް މަސްއޮޑި އޮރިޖިނަލްސް ގެ ގޯލް ކީޕަރު، ޔަލްސާން ވަނީ ހުށިޔާރު ކަމާއެކު ދިފާއު ކުރުމުންނެވެ.
މި މެޗުގައި މޮޅު ކުޅުމެއް ދައްކައި، މޮޅު ކުޅުންތެރިޔާގެ މަގާމު ވެސް ހާސިލު ކުރީ ، މަސްއޮޑި އޮރިޖިނަލްސްގެ ގޯލް ކީޕަރު ޖާރޒީ ނަންބަރު 99، ޔަލްސާންއެވެ.
މި މުބާރާތުގެ މެއިން ސްޕޮންސަރަކީ ބިގްމޭން ގެ "ޑުޕްރ ފިފްޓީން" އެވެ. ކޯ ސްޕޮންސަރަކީ އެސޯސިއޭޝަން ފޯ ޔޫތް އެމްޕަވަރމެންޓް އޮފް ގެމަނަފުށިއެވެ. މީގެއިތުރުން ވަން ކްލިކް މޯލްޑިވްސްއިން ހޯސޭލްކުރާ ލެމާރ ޖޫސްޕެކެޓާއި، ހުޅުމާލޭ ޑްރައިވަރސް އެސޯސިއޭޝަންނަކީވެސް ކޯ ސްޕޮންސަރުންނެވެ. ބެވެރޭޖް ޕާޓްނަރަކީ ރެޑްބުލްއެވެ.
ބޯލް ޕާޓްނަރަކީ މާކުއީ އެވެ. ސައުންޑް ޕާޓްނަރަކީ އޮފިޝަލް އިވެންޓްސް އެވެ. އަދި ޕްރިންޓިންގ ޕާޓްނަރަކީ ކުލަ މޯލްޑިވްސް އެވެ. މުބާރާތުގެ މީޑިއާ ޕާޓްނަރުންނަކީ، ދެން، ވަގުތު، ފަހުމިނެޓް އަދި މޯލްޑިވްސް ފުޓްސަަލް ޕްލޭޔާރސްއެވެ. އެހެނިހެން ސްޕޮންސަރުންނަކީ އަފޫ ޕެއިންޓްސް، މެރިލައިން މޯލްޑިވްސް، ޓޮޕް ތްރީ މޯލްޑިވްސްގެ އިތުރުން ޓްރިޕަލް އޭ އެޗް އެވެ.
މުބާރާތުގެ ޗެމްޕިއަން ޓީމަށް 25000 ރުފިޔާ ހަމަޖައްސާފައިވާއިރު ރަނަރަޕް ޓީމަށް 8000 ރުފިޔާ ވަނީ ކަނޑައަޅައިފަ އެވެ. މުބާރާތުގެ ޗެމްޕިއަން ޓީމަށް 15000 ރުފިޔާގެ އަގުހުރި ތައްޓެއް ދޭން ހަމަޖެހިފައިވާކަމަށް މަޅި އެމްވީން މައުލޫމާތުދެއެވެ.
