ބާޒާރުން ކެރެޓު ހުސްވުމާއެކު، ކިލޯއެއް 150ރުފިޔާ އަށް
ރާއްޖެއަށް ކެރެޓު އެތެރެ ކުރާ ފަރާތްތަކުގެ އަތުން ސްޓޮކް ހުސްވެ، ކެރެޓު ކިލޯއެއްގެ އަގު 150 ރުފިޔާއަށް އަރައިފިއެވެ.
މިއީ ފަހުގެ ތާރީހެއްގައި ކެރެޓުގެ އަގު އުފުލުނު ފުރަތަމަ ފަހަރެވެ. އެގޮތުން ކެރެޓު ނުލިބޭތާ މިހާރު ހަފްތާއެއް ވެފައި ވާކަމަށް ބާޒާރުމަތީ ބައެއް ފިހާރަތަކުން ބުނަމުން ގެންދާއިރު، އެ ސަރަހައްދުގެ ފިހާރަތަކުން ކެރެޓު ކިލޯއެއް 100ރ. އަށް ވުރެ މަތިން ވިއްކާތާ ވެސް ދުވަސްކޮޅެއް ވެއްޖެއެވެ.
މިކަމާ ގުޅިގެން ރާއްޖެއަށް ކެރެޓު އެތެރެކުރާ ބޭފުޅަކު އޮންލައިން ނޫހެއް ކަމަށްވާ "މިހާރު" އަށް ދިން އިންތަވިއު އެއްގައި ބުނެފައި ވަނީ ކެރެޓު ލިބުމުގައި ދަތިތަކެއް ހުރި ކަމަށާއި، އެހެން ނަމަވެސް އަންނަ މަހުގެ ފުރަތަމަ ދެ ހަފުތާ ތެރޭގައި ކެރެޓުގެ އާ ޝިޕްމަންޓެއް ލިބޭނެ ކަމަށެެވެ.
ބާޒާރުމަތީ ފިހާރަތަކާ އެކު ދަތުރުވެރިންގެ މާރުކޭޓާއި ލޯކަލް މާރުކޭޓުން ވެސް ކެރެޓު ހުސްވެފައި ވާއިރު، ކެރެޓު ދެން ލިބޭނީ އަންނަ ހަފުތާގައި ކަމަށް މާރުކޭޓުގެ ގޮޅިތައް ހިންގާ ބައެއް މީހުން ބުނަމުން ގެންދެއެވެ. އެހެން ނަމަވެސް އަގު ކުޑަވެދާނެ ކަމަކަށް އެ މީހުން ލަފާ ކޮށްފައެއް ނުވެއެވެ.
މާރުކޭޓު ސަރަހައްދާއި ބާޒާރުގައި ކެރެޓު ހުސްވި ނަމަވެސް މާލެ ތެރޭގެ ބައެއް ފިހާރަތަކުން ކެރެޓު ލިބެން އެބަ ހުއްޓެވެ. ގިނަ ފިހާރަތަކުން ކެރެޓު ކިލޯއެއް 150ރ. އަށް ވިއްކާ އިރު ބައެއް ފިހާރަތަކުން 85ރ. އާއި 100ރ. އާ ދެމެދުގެ އަގުތަކުގައި ވިއްކަމުން ވެސް އެބަ ގެންދެއެވެ.
ހުސްވި އެއްޗެއް ކީއްވެބާ 150 އައް ވިއްކަން ލިބުނީ..