"ތިޔަ ސަފު ހަދަނީ ނުބައިކޮށް، ޤިބްލަ ކޮބާ؟"
މާލޭގެ ބައެއް މިސްކިތްތަކުގެ ބޭރުގައި ދީނީ އުސޫލުތަކާ ޚިލާފަށް ސަފު ހަދައިގެން ނަމާދު ކުރަމުން ގެންދާ ކަމަށް ބުނެ ޝެއިހް އަލީ ޒައިދު ކަންބޮޑުވުން ފާޅު ކުރައްވައިފިއެވެ.
މާލޭގައި މިސްކިތްތައް ފުރި މަގުމަތީގައި ސަފު ހެދުމަކީ އާންމު ކަމަކަށް ނުވި ކަމުގައި ވިޔަސް، ހުކުރު ނަމާދާއި އީދު ނަމާދު ފަދަ ނަމާދު ތަކުގައި ހުރިހާ މިސްކިތެއްގައި ހެން ބޭރުގައި ސަފު ހަދަން ޖެހެއެވެ.
ޝެއިހް ޒައިދު ވަނީ ރޭގެ ވަގުތެއްގައި ޖަލާލުއްދީން މިސްކިތުގައި ސަފު ހަދާފައިވާ ފޮޓޯއެއް ހިއްސާ ކޮށްފައެވެ. އަދި އެ ފޮޓޯއިން ދައްކުވައިދެނީ އިމާމަށްވުރެ ކުރީގައި ސަފު ހަދައިގެން ނަމާދު ކުރާ މަންޒަރެވެ. މި ފޮޓޯ ހިއްސާ ކުރައްވާ ޝެއިހް ޒައިދު ވިދާޅުވީ މިސްކިތް ހުރީ ސަފުގެ ފަހަތުގައި ކަމަށާއި އިމާމަށްވުރެ ކުރީގައި ސަފު ނުހެދޭނެ ކަމަށެވެ. އަދި އެގޮތަށް ނަމާދު ކުރި މީހުން ނަމާދު ގަޟާ ކުރަން ޖެހޭނެ ކަމުގައި ވެސް ޝެއިހް ޒައިދު ވިދާޅުވިއެވެ.
މީގެ އިތުރުން މިއަދު ވެސް ޝެއިހް ޒައިދު ވަނީ މިސްކިތެެއްގެ ބޭރުގައި ސަފު ހަދާފައިވާ މަންޒަރު ދައްކުވައިދޭ ފޮޓޯއެއް ޓްވިޓާގައި ހިއްސާ ކޮށްފައެވެ. އެފޮޓޯއިން ދައްކުވައިދެނީ ފަނޑިޔާރު މިސްކިތު ބޭރުގައި ސަފު ހަދާފައިވާ ތަނެވެ. ނަމަވެސް އެކި ސަފު އެކިގޮތަށް ހަދާފައިވާ ތަން ފެނެެއެވެ. އެކި ސަފު އޮތީ އެކި އަރިއަށެވެ.
މި ފޮޓޯ ހިއްސާ ކުރައްވާ ޝެއިހް ޒައިދު ވިދާޅުވީ ފަނޑިޔާރު މިސްކިތުގެ ފަހަތުގައި އޮތް 3 ޖަމާއަތް މިއޮތީ 3 ގޮތަށް ކަމަށެވެ. އަދި ގިބްލަ ކޮބައިތޯ ވެސް ޝެއިހް ޒައިދު ވަނީ ސުވާލު ކުރައްވާފައެވެ. އަދި މިގޮތަށް ކަންތައްކުރުން ހެޔޮ ނުވާނެ ކަމުގައި ވެސް ޒައިދު ބުނެފައިވެއެވެ.
މާލޭގެ މިސްކިތްތަކުގައި ނަމާދު ފެށުމުގެ ކުރިން ވެސް އިމާމަށްވުރެ ކުރީގައި ސަފު ނުހެދުމަށް އިލްތިމާސް ކުރެއެވެ. އަދި މިސްކިތުގެ ސަފުތަކާއި ގުޅޭނޭހެން މިސްކިތުން ބޭރުގައި ހެދޭ ސަފުތައް ވެސް ހެދުމަށް އިލްތިމާސް ކުރެއެވެ.
