މިއަދަކީ ރައީސް ސޯލިހުގެ ސަރުކާރަށް ގޮތް ހުސްވިކަން ހާމަވާ ދުވަހެއް: ޝިޔާމް
މިއަދަކީ ރައީސް އިބްރާހިމް މުހައްމަދު ސޯލިހުގެ ސަރުކާރަށް ގޮތް ހުސްވި ކަން ހާމަވާ ދުވަހެއް ކަމުގައި ޕީޕީއެމްގެ ނައިބު ރައީސް އަދި ނައިފަރު ދާއިރާގެ މެންބަރު އަހުމަދު ޝިޔާމް ވިދާޅުވެއްޖެއެވެ.
5 އަހަރުގެ ޖަލު ހުކުމެއް ތަންފީޒު ކުރައްވަމުން އަންނަ އިދިކޮޅު ލީޑަރު އަދި ކުރީގެ ރައީސް އަބްދުﷲ ޔާމީން އަބްދުލްގައްޔޫމް މައްޗަށް އުފުލާފައިވާ ޝަރީއަތުގެ އަޑުއެހުމަކާއި އިދިކޮޅު ކޯލިޝަން މިވަގުތު ހިންގެވުމާއި ހަވާލުވެހުންނެވި ޢަބްދުއްރަޙީމް ޢަބްދުﷲ (އަދުރޭ) މައްޗަށް އުފުލާފައިވާ ދައުވާއެއްގެ ފުރަތަމަ އަޑުއެހުން މިއަދު ބޭއްވުމަށް ވަނީ ތާވަލް ކޮށްފައެވެ.
މިކަމާ ގުޅިގެން ޝިޔާމް ކުރެއްވި ޓްވީޓުގައި ވިދާޅުވީ މިއަދަކީ ރައީސް އިބްރާހީމް މުޙައްމަދު ޞާލިޙްގެ ސަރުކާރު "ރަނގަޅަށް ފިޓަށް ގޮއްސިކަން ހާމަވާ ދުވަހެއް" ކަމަށެވެ.
ރައީސް ޔާމީންގެ މައްޗަށް އުފުލާފައިވާ މަނީ ލޯންޑަރިންނާއި ރިޝްވަތު ގަބޫލުކުރުމުގެ ދައުވާގެ އަޑުއެހުމެއް މިއަދު މެންދުރު 14:00 ގައި ބޭއްވުމަށް ތާވަލް ކޮށްފައިވާއިރު އަދުރޭގެ މައްޗަށް ދައުވާ އުފުލާފައި ވަނީ ކްރިމިނަލް ކޯޓުގައި ކުރީގެ ރައީސް އަބްދުﷲ ޔާމީންގެ މައްޗަށް ހުކުމް ކުރަން އޮތް ދުވަހު، އެ ސަރަހައްދުގައި ހަޑިހުތުރު ބަހުން ވާހަކަ ދެއްކި މައްސަލައެކެވެ.
