ކޮވިޑުން ރައްކާތެރިވުމަށް މިއަދު ޖެހީ ޖުމްލަ 742 ވެކްސިން
ކޮވިޑް-19 އިން ރައްކާތެރިވުމަށް އަތޮޅުތެރެއިން 99 މީހަކަށާއި މާލެ ސަރަޙައްދުން 643 މީހުންނަށް މިއަދު ވެކްސިން ދީފިއެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އާންމު ކޮށްފައިވާ ޑޭޓާއަަށް ބަލާއިރު 742 މީހުންނަށް މިއަދު ކޮވިޑް ވެކްސިން ދީފައި ވެއެވެ. އަދި މިހާތަނަށް ޖުމުލަ 1،578 މީހުންނަށް ވެކްސިން ދީފައި ވެއެވެ.
މާލެ ސަރަޙައްދުން މިހާތަނަށް 1،309 މީހުންނަށް ވެކްސިން ދީފައި ވާއިރު އަތޮޅުތެރެއިން މިހާތަނަށް ޖުމްލަ 269 މީހަކަށް ވަނީ ވެކްސިން ދީފައެވެ.
މާލެ ސަރަޙައްދުގައި ވެކްސިން ދިނުމަށް 6 ސެންޓަރެއް ގާއިމު ކޮށްފައިވެއެވެ. އަތޮޅުތެރޭގައި ގާއިމް ކޮށްފައި ވަނީ 3 ސެންޓަރެކެވެ.
ރާއްޖޭގައި މިވަގުތު ދެމުން ދަނީ އިންޑިއާގެ ސީރަމް އިންސްޓިޓިއުޓުން އުފައްދާފައިވާ، އަދި ރާއްޖެއަށް ހަދިޔާ ކޮށްފައިވާ އަސްޓްރާޒެނެކާ "ކޮވިޝީލްޑް" ވެކްސިނެވެ.
އެޗްޕީއޭއިން އާއްމުކޮށްފައިވާ ސާވޭލަންސް ޑޭޓާއަށް ބަލާއިރު މިއަދު ރާއްޖެއިން ކޮވިޑަށް ފައްސި ވެފައިވަނީ މާލެއިން 102 މީހުންނާއި، އަތޮޅުތެރެއިން 4 މީހަކާއި ހިންގަމުން އަންނަ ރިސޯޓުތަކުން 15 މީހެކެވެ.
މިހާރު ރާއްޖެއިން މިބައްޔަށް ޖުމްލަ 16،276 މީހުން ފައްސި ވެފައިވެއެވެ.
ރާއްޖެއިން މިހާރު ކޮވިޑް ބަލިން ފަސޭހަ ވެފައިވަނީ ޖުމްލަ 14،337 މީހުންނެވެ. އަދި މިބަލީގައި ރާއްޖެއިން ނިޔާވި މީހުންގެ ޖުމްލަ އަދަދު މިހާރު 53 އަށް އަރައެވެ.
