ރާއްޖޭގައި ކޮވިޑް ފެތުރުމާއި ފަތުރުވެރިންނާ ގުޅިފައެއް ނުވޭ: ޑރ. މައުސޫމް
ރާއްޖޭގައި އަނެއްކާވެސް ކޮވިޑް-19 ހަލުވިކަމާއެކު ފެތުރުމާއި ފަތުރުވެރިކަމާ ނުވަތަ ފަތުރުވެރިންނާ އެހާބޮޑަށް ގުޅިފައި ނެތްކަން ފާހަގަ ކުރެވޭކަމަށް ޓޫރިޒަމް މިނިސްޓަރ ޑރ. ޢަބްދުﷲ މައުސޫމް ވިދާޅުވެއްޖެއެވެ.
ރާއްޖޭގައި މިހާރު ކޮވިޑް-19 އަށް ފައްސިވާ އަދަދު އިތުރުވަމުން ދަނީ ރާއްޖެއިން ބޭރުން އަންނަ ފަރާތްތައް ނުވަތަ ފަތުރުވެރިން އިތުރުވަމުންދާތީ ކަމަށް ބައެއް ފަރާތްތަކުން ދަނީ ފާހަގަކޮށް، ކަންބޮޑުވުން ފާޅު ކުރަމުންނެވެ.
އެކަމާ ގުޅޭގޮތުން "ދެން" އަށް ދެއްވި ޚާއްސަ ބަސްދީގަތުމެއްގައި މިނިސްޓަރ މައުސޫމް އިއްޔެ ވިދާޅުވީ، ކޮވިޑްގެ ހާލަތުގައި ވެސް ރާއްޖެ މަޝްހޫރު ވެގެން ދިޔައީ ވަރަށް ފުރިހަމައަށް ފަތުރުވެރިންނަށާއި މުވައްޒަފުންނަށް އަދި އާއްމު ރައްޔިތުންނަށް ބޭނުންވާ ސަލާމަތާއި ރައްކާތެރިކަން ދީގެން ފަތުރުވެރިކަން ހިންގި ޤައުމެއްގެ ގޮތުގައި ކަމަށެވެ.
މިނިސްޓަރ މައުސޫމް ވިދާޅުވީ އެމިނިސްޓްރީން އެންމެ ފުރަތަމަ ވެސް މުހިންމު ކަމަކަށް ކުރެއްވި އެއް ކަމަކީ ރާއްޖެއަށް އަންނަ ހުރިހާ ފަތުރުވެރިންނަކީ ވެސް ނެގަޓިވް ޕީސީއާރް ޓެސްޓު ނަތީޖާއެއް ހިފައިގެން އަންނަ ފަތުރުވެރިން ކަމުގައި ހެދުން ކަމަށެވެ.
"އެކަމުގެ ނަތީޖާ ވަރަށް ރަނގަޅު. މިދިޔަ އަހަރު ފަތުުރުވެރިން ޕޮޒިޓިވްވީ މިންވަރު އޯގަސްޓް/ސެޕްޓެމްބަރުގައި ތަންކޮޅެއް މަތިވި ކަމުގައިވީ ނަމަވެސް، މިދިޔަ ޑިސެމްބަރު މަހު ރާއްޖެ އައި ކޮންމެ 1000 ފަތުރުވެރިއަކުން ޕޮޒިޓިވްވީ ކަމަށް ދެއްކީ ހަތް މީހުން. އެއީ 0.07 އިންސައްތަ. ދެން ޖަނަވަރީ މަހު ދެއްކީ ކޮންމެ 1000 ފަތުރުވެރިއަކުން އަށް ފަތުރުވެރިން، އެއީ 0.08 އިންސައްތަ. މިދެންނެވީ ރާއްޖެއިން ފުރާ ފަތުރުވެރިން ފުރާއިރުވެސް އެގްޒިޓް ޕީސީއާރް ޓެސްޓު ހަދާނެ. އެޓެސްޓުތައް ހަދައިގެންނާ އެއްކޮށް ފެންނަ ނަތީޖާ މިއީ." ޑރ. މައުސޫމް ވިދާޅުވިއެވެ.
މީގެއިތުރުން ޑރ. މައުސޫމް ވިދާޅުވީ ފަތުރުވެރިއެއްގެ ގައިން ދިވެއްސެއްގެ ގަޔަށް ކޮރޯނާ ވައިރަސް އެރިކަމުގެ އެއްވެސް ރިކޯޑެޑް ކޭސްއެއް މިހާތަނަށް ލިބިފައި ނުވާ ކަމަށެވެ.
"ރިކޯޑެޑް ކޭސްއެއް އަޅުގަނޑުމެންނާ ހަމައަށް ނެތް އައިސްފައެއް. ބައެއް ރިސޯޓުތަކުގަ މުވައްޒަފުންގެ މެދުގައި ކްލަސްޓާސް އުފެދޭ. އެކަމަކު ވަކިވަކި ރިސޯޓުތަކުގަ. އެކަންކަން ވަރަށް ފުރިހަމައަށް މެނޭޖް ކުރަމުން އެއަންނަނީ. އަޅުގަނޑުމެން ރިސޯޓުތަކުން ރެންޑަމް ސާމްޕަލް ނަގަން ފަށައިފިން ޑިސެމްބަރު ތެރޭގަ. ކޭސްއެއް ފެނިއްޖެނަމަ މެނޭޖް ކޮށްލަނީ. އެޗްޕީއިން ފަތުރުވެރިކަމުގެ ދާއިރާއަށް ހަދާފައިވާ ގައިޑްލައިންތަކަކީ މިނިސްޓްރީގެ ލަފަޔާއި އިރުޝާދުގެ ވެސް މައްޗަށް ހަދާފައިވާ ގައިޑްލައިނުތަކެއް. މި ގައިޑްލައިންތަކާއި އެއްކޮށް މެނޭޖް ކުރެވޭ." ޑރ. މައުސޫމް ވިދާޅުވިއެވެ.
