ރިޔާސީ ބަޔާން: މި އަހަރު އިތުރު ފަސް އެއާޕޯޓެއް ހުޅުވަނީ
ރާއްޖޭގައި އިތުރު 5 އެއާޕޯޓެއް އަޅަން ގަސްތު ކުރައްވާ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
މިއަހަރަށް ރައްޔިތުންގެ މަޖްލިސް ހުޅުވުމަށް ބޭއްވި ޖަލްސާގައި، ރިޔާސީ ބަޔާން އިއްވަވަމުން ރައީސް ސޯލިހު ވިދާޅުވީ ފާއިތުވި އަހަރުގައި ހއ. ހޯރަފުށީ އެއާޕޯޓު ހުޅުވާފައި ވާކަމަށާއި ތަރައްގީ ލާމަރުކަޒު ކުރުމުގެ ނާރެހަކީ ފަސޭހަ ދަތުރުފަތުރުގެ ނިޒާމަކުން ރަށްތައް ގުޅައިލުން ކަމަށެވެ.
އަދި މި އަހަރުގެ ވެސް އިތުރު ފަސް އެއާޕޯޓެއްގެ މަސައްކަތް ކުރުމަށް ނިންމާފައިވާ ކަމަށް ރައީސް ވިދާޅުވިއެވެ.
"އޭގެ ތެރެއިން މ. މުލީގައި ތަރައްގީ ކުރާ އެއާޕޯޓުގެ މަސައްކަތް، އިރާދަކުރެއްވިއްޔާ މި މަހުގެ ތެރޭގައި ބަޔަކާ ހަވާލުކުރެވޭނެ. ހދ. މަކުނުދު އާއި ށ. ބިލެތްފަހި އަދި ބ. ތުޅާދުއާއި ތ. ވިލުފުށީގައި އެއާޕޯޓް ހަދައިދޭނެ ބަޔަކު ހޯދަން މިހާރު ވާނީ ހުޅުވާލާފައި،" ރައީސް ވިދާޅުވި އެވެ.
މީގެ އިތުރުން ދަތުރުވެރިންނާއި މުދާ އުފުލާ ފެރީ ނިޒާމުން މުޅި ރާއްޖެ ގުޅުވައިދޭ "ހައި ސްޕީޑް ފެރީ" ނެޓްވޯކްގެ މަސައްކަތް އަޅުގަނޑުމެން ގަސްދު ކުރީ މިދިޔަ އަހަރުގެ ތެރޭގައި ފަށަން ގަސްދުކުރި ނަމަވެސް ކޮވިޑްގެ ސަބަބުން އެކަން ހުއްޓިފައި އޮތުމަށްފަހު މިދިޔަ މަހުގެ 17 ވަނަ ދުވަހު އެ މަސައްކަތް އެމްޓީސީސީއާ ހަވާލުކޮށްފައިވާ ކަމަށް ވެސް ރައީސް ވިދާޅުވިއެވެ.
