ރަޖިސްޓްރީ ނުކުރިޔަސް 65 އަހަރުން މަތީ މީހުންނަށް ވެކްސިން ދެވޭނެ!
މާލޭގައި ދިރިއުޅޭ 65 އަހަރުން މަތީގެ މީހުންނަށް ކޮވިޑް ވެކްސިން ޖެހުމަށް ޕޯޓަލްގައި ރެޖިސްޓްރީ ނުކުރި ނަމަވެސް، ވެކްސިން ދޭ މަރުކަޒުތަކަށް ދިއުމުން ވެކްސިން ޖަހައިދޭން ފަށައިފިއެވެ.
މިކަމާ ގުޅިގެން ޑރ އަހުމަދު ފައިސަލް ވަނީ ޓުވީޓު ކުރައްވައިފައެވެ. ސޯޝަލް ސެންޓަރުގައި 65 އަހަރުން މަތީ ބޭފުޅުންނަށް ވެކްސިން ދިނުމުގެ ޚިދުމަތް މިވަގުތު ކުރިއަށް ދާ ކަމުގައި އޭނާ ވަނީ ވިދާޅުވެފައެވެ.
އެގޮތުން ސޯޝަލް ސެންޓަރުގެ އިތުރުން ހުޅުމާލޭ ފްލޫ ކްލިނިކް ހުރި ތަންތަނުން ހެނދުނު 9:00 އަކާއި ހަވީރު 5:00 އާ ދެމެދު 65 އަހަރުން މަތީ މީހުންނަށް ވެކްސިން ޖަހައިދޭނެ ކަމުގައި ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ވަނީ ބުނެފައެވެ.
މިކަމާ ގުޅިގެން އެޗްއީއޯސީ ގެ އިސް އޮފިޝަލެއް ކަމަށްވާ ތަސްލީމާ އުސްމާން، އޮންލައިން ނޫހެއް ކަމަށްވާ "މިހާރު" އަށް ދެއްވި އިންޓަރވިއުއެއްގައި ވިދާޅުވީ، އުމުރުން ދުވަސްވީ ބައެއް ފަރާތްތައް އަދިވެސް ރެޖިސްޓްރީ ނުވާ ކަމަށާއި، ކޮވިޑުގެ ނުރައްކަލުން ސަލާމަތް ވުމަށް ވެކްސިން ޖެހުމަށް އެބޭފުޅުން ރަޖިސްޓްރީ ނުވިޔަސް ސެންޓަރުތަކުން ވެކްސިން ޖަހައިދޭނެ ކަމަށެވެ.
މި ވަގުތު ވެކްސިން ޖަހައިދެނީ މާލެ ސަރަހައްދުގެ 6 ސެންޓަރެއްގެ އިތުރުން ހދ. ކުޅުދުއްފުއްޓާއި އައްޑޫ ސިޓީގައެވެ. އޭގެ އިތުރުން ހއ. އަތޮޅާއި ނ. އަތޮޅާއި ލާމު އަދި ފުވައްމުލަކުގައި ވެކްސިން ދޭން މިއަދު ފަށާނެ އެވެ.
