ނިދުނީ އެއާޕޮޑް ޖަހައިގެން އޮއްވާ، ދެންވީ، މާ ނުރައްކާތެރި ގޮތެއް
އެއާޕޮޑްސް އަކީ މިހާރު ވަރަށް ގިނަ ބަޔެއްގެ މެދުގައި މަޤުބޫލު އެއްޗެކެވެ. އުފަންދުވަހުގެ ހަދިޔާ އަކަށް ވެސް ބޭނުންވަނީ އެއާޕޮޑްސް އެވެ. މުސާރަ އެއްކޮށްގެން ވެސް އެއާޕޮޑްސް ގަންނަ މީހުން މަދެއް ނޫނެވެ. ބައެއް މީހުންގެ ނަޒަރުގައި އެއާޕޮޑްސް އަކީ މީހާގެ ފެންވަރު ދައްކުވައިދޭ އެއްޗެކެވެ. އެހެންކަމުން އެއާޕޮޑްސް ގެންގުޅުން ވެފައި ވަނީ ކޮންމެހެން ވެސް ކުރަންޖެހޭ ކަމެއްގެ ގޮތުގައެވެ.
އެމެރިކާގެ ސިޓީއެއް ކަމަށްވާ ވޯރކެސްޓާއަށް ނިސްބަތްވާ ބްރެޑް ގޮތިޔާ މި ވަނީ އެއާޕޮޑްސް އެއީ ގެންގުޅެން ހެޔޮވާ ވަރުގެ އެއްޗެއް ނޫންކަމުގައި ބުނެފައެވެ. އޭނާ މިހެން ބުނެފައި ވަނީ ދާދި ފަހުން އޭނާއަށް ދިމާވި ހާދިސާއަކާ ގުޅިގެންނެވެ.
އެެއާޕޮޑް ކަންފަތަށް ޖަހައިގެން ނިދިފައި އޮއްވާ އޭނާއަށް ވަނީ އެއާޕޮޑް ދިރުވާލެވިފައެވެ. ރިޕޯޓްތައް ބުނާ ގޮތުގައި ބްރެޑަށް އެއާޕޮޑްސް ދިރުވުނުކަން އެނގުނީ ފެން ބޯން އުނދަގޫ ވާތީއެވެ. އަދި އޭނާ އަށް ހޯދާ ހޯދާ އެދުވަހު އެއާޕޮޑްސް ވެސް ނުފެނުމުންނެވެ. އެއީ އާންމުކޮށް ނިދާ އިރު ކަންފަތުގައި ޖަހައިގެން އޮންނަ އެއްޗަކަށް ވެފައި ހޭލެވުނު އިރު ނެތުމުން ޝައްކު އުފެދިގެން އޭނާ ވަނީ އެކްސްރޭ އެއް ނަގައިފަ އެވެ. މި އެކްސްރޭ އިން ބްރެޑްގެ ފުއްޕާމޭ ތެރޭގައި އެއާޕޮޑްސް އޮތްތަން ވަނީ ފެނިފައެވެ.
އެއާއެކު ބްރެޑްގެ އޮޕަރޭޝަން ކުރުމަށް ޑޮކްޓަރުން ލަފާދިނެވެ.އަދި އޭނާގެ އޮޕަރޭޝަން ވަނީ އެދުވަހު ކާމިޔާބު ކަމާއި އެކު ކުރެވިފައެވެ. މި ހާދިސާއާ ގުޅިގެން ބްރެޑް ވަނީ އެއާޕޮޑްސް ގެންގުޅުމުގައި ވީހާވެސް ފަރުވާތެރި ވުމަށް އިލްތިމާސް ކޮށްފައެވެ.
