ހުރިހާ ހުއްދައެއް ހޯދައިގެން މެނުވީ ކާޑެއްދޫ އެއާޕޯޓަށް ނޭރުމަށް އެދިއްޖެ
ލިޔުމުން ހޯދަންޖެހޭ ހުރިހާ ހުއްދައެއް ހޯދައިގެން މެނުވީ އެއްވެސް ރަށަކުން އެއްވެސް މީހަކު ގދ. ކާޑެއްދޫ އެއާޕޯޓަށް ނޭރުމަށް އެ އެއާޕޯޓުގެ ފަރާތުން އެދިއްޖެއެވެ.
މިކަމާ ގުޅޭގޮތުން ކާޑެއްދޫ އެއާޕޯޓުން މިއަދު ނެރުނު އެންގުމެއްގައި ބުނީ އެއާޕޯޓުގެ ހިދުމަތް ދިނުމުގައި ސީދާގޮތުންނާއި ނުސީދާގޮތުން ގުޅުންހުރި މީހުންނާއި ކާޑެއްދޫ ސަރަހައްދުގެ ރަށްރަށުގައި ކޮވިޑް19ގެ ވިއުގައެއް ފެންނަމުން ދާތީ، އެންމެންގެ ރައްކާތެރިކަމަށްޓަކައި އެއާޕޯޓުގައި ރައްކާތެރިކަމުގެ ފިޔަވަޅުތައް އިތުރު ކުރަމުންދާ ކަމަށެވެ.
އެގޮތުން، ވަކި ގޮތެއް އަންގަންދެން ފުރުމަށް ހުރިހާ ކަމެއް ހަމަޖެހިގެން ލިޔުމުން ހޯދަންޖެހޭ ހުރިހާ ހުއްދައެއް ހޯދައިގެން ކާޑެއްޑޫ އެއާޕޯޓަށް އަންނަ ދަތުރުވެރިންނާއި ފަތުރުވެރިން ފިޔަވައި އިތުރު އެއްވެސް މީހަކު އެއްވެސް ރަށަކުން އައިސް ކާޑެއްދޫ އެއާޕޯޓަށް ނޭރުމަކީ އެއާޕޯޓުގެ ހިދުމަތް ހޯދާ އެންމެންނަށް ވަރަށް ބޮޑު ހިތްހަމަޖެހުމަކާއި ރައްކާތެރިކަމެއް ލިބޭނެ ކަމެއް ކަމަށް ވެސް އެއެންގުމުގައި ބުނެފައިވެއެވެ.
"މިގޮތުން މި ހާލަތުގައި މި އެއާޕޯޓަށް އެރުން ރަނގަޅު ނޫން ފަރާތްތަކުގެ ތެރޭގައި މިތަނަށް އައިސްގޮސް އުޅޭ އުޅަނދުތަކުގެ ކްރޫއިންނާއި، ކާގޯ ފޮނުވާ ނެގުމަށް އަންނަ ފަރާތްތަކާއި، ފުރާ މީހުންނާއި އެކުގައި އަންނަ ފަރާތްތައް ފަދަ މީހުން ހިމެނެ އެވެ." ކާޑެއްދޫ އެއާޕޯޓުން ނެރުނު އެންގުމުގައި ވެއެވެ.
