ޝުޖާޢު ސަރުކާރަށް: ރޯދަ މަހު ދުވާލު މިސްކިތްތައް ބަންދު ކުރުމުގެ ވިސްނުން ގެންގުޅެގެން ނުވާނެ
ރޯދަ މަހު ދުވާލު މިސްކިތްތައް ބަންދު ކުރުމުގެ ވިސްނުން ގެންގުޅެގެން ނުވާނެ ކަމަށް ޕީއެންސީގެ ނާއިބު ރައީސް އިބްރާހީމް ޝުޖާޢު ވިދާޅުވެއްޖެއެވެ.
ޝުޖާޢު މިހެން ވިދާޅުވެފައިވަނީ ކުރެއްވި ޓްވީޓެއްގައެވެ.ޝުޖާއު ވިދާޅުވީ ކޮވިޑް-19 ބަލިމަޑުކަމުން އަރައިގަތުމަށް ސަރުކާރަށް ފުރުސަތު ދެވިއްޖެ ކަމަށާއި ރޯދަ މަހު ދުވާލު މިސްކިތްތައް ބަންދު ކުރުމުގެ ވިސްނުން ގެންގުޅެގެން ނުވާނެ ކަމަށެވެ.
“ސަރުކާރަށް ކޮވިޑް ކޮންޓްރޯލް ކުރުމަށް ފުރުސަތު ދެވިއްޖެ. އެކަށީގެންވާ ވަގުތު ވެސް ދެވިއްޖެ. ކުރިޔަށްއޮތް ބަރަކާތްތެރި ރަމަޟާން މަހަށް މިސްކިތައް ބަންދު ކުރުމުގެ ވިސްނުން ގެންގުޅޭނަމަ އެކަން އަވަހަށް ދޫކޮށްލައްވާ. އަޅުގަނޑުމެން ނަމާދު ކުރަން ބޭނުންވަނީ މިސްކިތުގަ. އެކަން ނުހުއްޓުވޭނެ”ޝުޖާޢުގެ ޓްވީޓްގައި ވެއެވެ.
ކޮވިޑް-19 ފެތުރެން ފެށުމާ ގުޅިގެން ބަލި ފެތުރުން ކޮންޓްރޯލް ކުރުމުގެ ގޮތުން މާލެ އާއި ބައެއް ރަށްރަކުގައި މިސްކިތްތައް މިދިޔަ އަހަރު މާޗް މަހުގެ ތެރޭގައި ވަނީ ބަންދުކޮށްފައެވެ. އެހެންނަމަވެސް ބަލި ޖެހޭ މީހުންގެ ނިސްބަތް މަދުވާން ފެށުމާއި އެކު ފަހުން މިސްކިތްތައް ވަނީ ހުޅުވާލާފައެވެ.
އިސްލާމިކް މިނިސްޓްރީން ވަނީ ކޮވިޑްގެ ބަލިމަޑުކަމުގެ މި ހާލަތުގައި މިސްކިތަށްދާ މީހުން އަމަލުކުރަން ޖެހޭ އުސޫލެއް އެކުލަވާލާފައެވެ. ކޮވިޑް-19 ބަލި މަޑުކަމަކީ ފަސޭހައިން ގައިން ގަޔަށް އަރާ ބައްޔެއް ކަމަށް ވުމާއެކު މިނިސްޓްރީން ވަނީ އެ އުސޫލުތަކަށް އަމަލު ކުރުމަށް އެދިފައެވެ.
