ކޮވިޑް-19: ހިތަދޫން ކުޑަ ކުއްޖަކާއި އުމުރުން ދުވަސްވީ މީހަކު ފައްސި ވެއްޖެ
އައްޑޫސިޓީ ހިތަދޫން ކުޑަ ކުއްޖަކާއި އުމުރުން ދުވަސްވީ މީހަކު ކޮވިޑް-19 އަށް ފައްސި ވެއްޖެއެވެ.
"ދެން" އަށް އެނގިފައިވާ ގޮތުގައި ހިތަދޫން ކޮވިޑަށް ފައްސި ވެފައިވަނީ ކުރިން އެރަށުން ފައްސިވީ މީހެއްގެ ދަރިފުޅެވެ.
އައްޑޫ ސިޓީގެ މޭޔަރު ޢަބްދުﷲ ޞާދިޤު "ދެން" އަށް މައުލޫމާތު ދެއްވަމުން ވިދާޅުވީ، ފައްސިވީ ކުޑަ ކުއްޖާއާއި އުމުރުން ދުވަސްވި މީހާ ވެސް ހިމެނެނީ އިއްޔެ އެރަށުން ފައްސިވީ 15 މީހުންގެ ތެރޭގައި ކަމަށެވެ. އިތުރު ތަފްސީލެއް ލިބިފައެއް ނުވެއެވެ.
ހެލްތު އިމަޖެންސީ އޮޕަރޭޝަން ސެންޓަރ (އެޗްއީއޯސީ) އިން ރޭގައި ކުރިއަށްދިޔަ ނޫސްވެރިންގެ ބައްދަލުވުމުގައި ޑރ. މައުރޫފް ވިދާޅުވީ، ހިތަދޫއިން ފުރަތަމަ ފައްސިވި މީހާއާ ބައްދަލުވި 44 ފަރާތެއް މިވަގުތު އައްޑޫގެ ގުޅިފައިވާ ހަތަރު ރަށުގައި އެބަ ތިބި ކަމަށާއި މި ކްލަސްޓާއާ ގުޅުންހުރި 25 މީހަކު ތިނަދޫން ވެސް ފެނިފައިވާ ކަމަށެވެ.
ހިތަދޫން އުފެދުނު މިކްލަސްޓާއާ ގުޅުން ހުރި ކަންކަން ޓާސްކްފޯހާ ގުޅިގެން ބަލަމުން އަންނަ ކަމަށް ވެސް އެޗްއޯސީން ބުނެއެވެ.
ކަރަންޓީނުގައި ނެތް ދެ މީހަކު ހިތަދޫން ކޮވިޑަށް ފައްސި ވެފައިވަނީ މިމަހުގެ 5 ވަނަ ދުވަހުގައެވެ. އެމީހުން ކޮވިޑަށް ފައްސިކަން އެނގުނީ ބަލިވެގެން ޑޮކްޓަރަށް ދައްކަން ދިޔުމުން ނެގި ސާމްޕަލް ފައްސި ވުމުންނެވެ.
