ކުނިއަޅާ ޑަސްބިނުގެ ފުލަށް ކަފަ ބޯޅަ އަޅަންވީ މިހެންވެ!
ކުނި އަޅާ ޑަސްބިނުން ނުބައިވަސް ދުވުމަކީ އާންމުކޮށް ދިމާވާ ކަމެކެވެ. އަދި ބައެއް ފަހަރު ޑަސްބިން ދޮވުމުން ވެސް ވަސް ނުފިލާ ހުރުމަކީ ދިމާވާ ކަމެކެވެ. ހަމައެއާއެކު ޑަސްބިން ފުލުގައި ކުނި ހަރުލުމާއި ފަހުން ޑަސްބިން ސާފުކުރާ އިރު އެ ކުނި ސާފުކުރުމަށް އުނދަގޫ ވެއެވެ. އެހެންކަމަށް ވާނަމަ ކުނިއަޅާ ޑަސްބިނުގެ ފުލަށް އަޅަންވީ ކަފަ ބޯޅައެވެ.
ކަފަ ބޯޅަ ތެލުން ފޯކޮށްލާ ޑަސްބިނުގެ ފުލަށް އެޅުމުން ކުނި ވަސް ދުވާ މައްސަލަ ހައްލު ވީއެވެ. ނަމަވެސް ހަނދާން ކުރަންވީ ކަމަކީ ކަފަތައް ފޯ ކުރުމަށް ކޮންމެ ކޮންމެ ތެލެއް ބޭނުން ނުކުރުމެވެ. އެގޮތުން ލެމަންގްރާސް ތެޔޮ އަދި ނީމް ތެޔޮ ބޭނުން ކުރުން ރަނގަޅު ވާނެއެވެ . އަދި 2 ހަފްތާއިން ކަފަތައް ބަދަލު ކުރަން ސަމާލުކަން ދޭން ވާނެއެވެ .
ކުނި ވަސް ދުވާ މައްސަލައަށް ހައްލު ހޯދުމަށް ކަފަ ބޯޅަ ނޫނަސް ޑަސްބިން ފުލަށް އެހެން ތަކެތި އެޅިދާނެއެވެ. އެގޮތުން ބައެއް މީހުން ބޭކިން ސޮޑާ ވެސް ބޭނުން ކުރެއެވެ. ނަމަވެސް ކަފައާ ޚިލާފަށް ކޮންމެ ދުވަހަކު ވެސް ބޭކިން ސޮޑާ ޑަސްބިނުގެ ފުލަށް އަޅަން ޖެހޭނެއެވެ.
މިފަދަ ކަންކަމުން ޑަސްބިނުން ނުބައި ވަސް ދުވާތީ ކަންބޮޑުވާކަށް ނުޖެހޭނެއެވެ. ކަފަ ބޯޅައާއި ބޭކިން ސޮޑާއަކީ މިފަދަ ވަރަށް ގިނަ ކަންކަމުގެ ހައްލެވެ.
