ލޯބިވެރިއެއް ހޯދަން ކުރި މަސައްކަތުން މުޅިންވެސް ދިމާވީ އެއްބަފާ މީހުންނާ؛ ބެލިއިރު ބައްޕަ ވީ ދަރިފަނި ހަދިޔާ ކުރާ މީހަކަށް
މިއީ އުމުރުން 24 އަހަރުގެ ޒޭވް ފޯސް ޑޭޓިން އެޕްތައް ބޭނުން ކޮށްގެން ލޯބިވެރިއަކު ހޯދަން މަސައްކަތްކޮށް އެކަން ނާކާމިޔާބު ވީ ގޮތުގެ ވާހަކައެވެެ.
އޭނާއަށް ޑޭޓިން އެޕްތަކުން ކޮންމެ ފަހަރަކު ވެސް ދިމާވަނީ ގެއްލިފައިވާ އޭނާގެ އެއްބަފާ އަންހެނުންނެވެ. ޒެފް މިކަމުގައި ކުށްވެރި ކުރަނީ އޭނާގެ ބައްޕައެވެ. ސަބަބަކީ އޭނާގެ ބައްޕަ އަކީ މީގެ ކުރިން އެކި ގައުމުތަކުގައި ދަރިފަނި ހަދިޔާ ކުރަން އުޅުނު މީހަކަށް ވާތީއެވެ.
ރިޕޯޓްތައް ބުނާ ގޮތުގައި ފާއިތުވެދިޔަ އަހަރުތަކުގައި ޒޭވްއަށް ވަނީ އޭނާގެ އެއްބަފާ 8 ކުދިން ހޯދިފައެވެ. އަދި ޒޭވް ބުނާ ގޮތުގައި އޭނާގެ އެއްބަފާ ކިތައް މީހުން ދުނިޔޭގައި އުޅޭނެކަން އޭނާއަށް ވެސް ނޭނގެއެވެ. އަދި އޭނާ ބުނީ ނޭނގުމެއްގެ ތެރޭގައި އޭނާއަށް އެއިން މީހަކާ ކައިވެނި ވެސް ކުރެވިދާނެ ކަމަށެވެ.
މިގޮތަށް ކަންތައް ވަމުންދާތީ ޒޭވް ވަނީ ޑީއެންއޭ ޓެސްޓެއް ނުހަދާ ހަޔާތުގެ ބައިވެރިއަކު އިހްތިޔާރު ނުކުރަން ނިންމާފައެވެ. އަދި ޒޭވް ނޫނަސް އޭނާގެ އެއްބަފާ އެހެން ކުދިންނަށް ވެސް މި މައްސަލައާ ކުރިމަތިވި ކަމަށާއި އަވަށްޓެރި ގެތަކުގައި އުޅޭ ކުދިންނަކީ އެއްބަފާ ކުދިންކަން ނޭނގިވެސް އެބަހުރި ކަމަށް ރިޕޯޓްތައް ބުނެއެވެ.
ޒޭވް ބުނާ ގޮތުގައި އޭނާގެ ބައްޕަ ވަނީ 10 އަހަރު ދުވަހުގެ ތެރޭގައި 100 އަށްވުރެ ގިނަ ފަހަރަށް ދަރިފަނި ހަދިޔާ ކޮށްފައެވެ. އެހެންކަމުން ޒޭވް ބައްޕަގެ ފަންސާހަށްވުރެ ގިނަ ދަރިން ތިބޭނެ ކަަމަށް ލަފާ ކުރެވެއެވެ.
Ads by STO
