ރެސްޓޯރެންޓަކަށް "ޓިޕްސް"ގެ ގޮތުގައި 30،000އަށްވުރެ ގިނަ ރުފިޔާ ދިނީ މިހެންވެ!
ރެސްޓޯރެންޓަކަށް ކާން ގޮސް، އެތަނުން ލިބޭ ޚިދުމަތާއި ކާނާގެ ފެންވަރު ރަނގަޅު ނަމަ ބައެއް ފަހަރަށް ޚިދުމަތް ދިން މުވައްޒަފުގެ އަގުވަޒަން ކުރުމަށްޓަަކައި، އެމުވައްޒަފަކަށް "ޓިޕްސް"ގެ ގޮތުގައި ބައެއް މީހުން ފައިސާ ދީ އުޅެއެވެ. އެހެން ނަަމަވެސް "ޓިޕްސް"ގެ ގޮތުގައި ގިނަ އަދަދެއްގެ ފައިސާ ދޭ ވާހަކަ އަޑު އަހަނީ ވަރަށް މަދުންނެވެ. މިއޮތީ ވެސް އެފަދަ ވާހަކައެކެވެ.
މިއީ ދެ ލޯބިވެރިއަކު ރެސްޓޯރެންޓަކަށް 2000 ޑޮލަރުގެ ޓިޕެއް ދިން ވާހަކައެވެ. އެއީ ރާއްޖޭގެ ރުފިޔާއިން ނަމަ 30،000އަށް ވުރެ ގިނަ ރުފިޔާއެވެ. ސުވާލަކީ މިހާ ގިނަ އަދަދެއްގެ ފައިސާ މި ރެސްޓޯރެންޓަށް މި ދެ ލޯބިވެރިން ހަދިޔާ ކުރީ ކޮން ސަބަބަކާ ހުރެ ބާވައެވެ.
އިންޑިއާގެ ނޫހެއް ކަމަށްވާ "އިންޑިއާ ޓައިމްސް"އަށް މައުލޫމާތު ދެމުން މި ރެސްޓޯރެންޓުގެ ވެރި ފަރާތުން ވަނީ މި ރެސްޓޯރެންޓާއި އެ ދެލޯބިވެރިންނާ އޮތް ގުޅުން ކިޔައިދީފައެވެ. އެގޮތުން މި ރެސްޓޯރެންޓަކީ މި ދެލޯބިވެރިން ފުރަތަަމަ ބައްދަލުވި މަންޒިލެވެ، އެ ދެމީހުން އެންމެ ފުރަތަމަ ބައްދަލުވީ މީގެ ވިހި އަހަރުކުރިން 2001 ވަނަ އަހަރުގެ ފެބްރުވަރީ މަހުގެ 12 ވަނަ ދުވަހުއެވެ. އަދި އެ އުފާވެރި މަންޒިލަށް އެ ދެލޯބިވެރިން ކޮންމެ އަހަރަކު އެ ތާރީހުގައި އަންނަ ކަމަށް އެ ރެސްޓޯރެންޓުގެ ވެރިޔާ ބުނެއެވެ.
މި ދެލޯބިވެރިން ރެސްޓޯރެންޓަށް ގޮސް ކޮންމެ އަހަރަކު ވެސް ތިބެނީ އެއް މޭޒެއްގައެވެ. އެއީ އެ ރެސްޓޯރެންޓުގެ ޓޭބަލް ނަންބަރ 46 އެވެ. އަދި މި ދެ ލޯބިވެރިން އެތަނަށް ދަނީ ކޮންމެ އަހަރަކު ވެސް އެއް ވަގުތެއްގައެވެ. އެއީ އިރުއޮއްސި 7:30ގައެވެ.
މި ދެލޯބިވެރިން އެ ރެސްޓޯރެންޓަށް ޓިޕްސްގެ ގޮތުގައި 2000 ޑޮލަރު ހަދިޔާކޮށް، އެމީހުންގެ ބިލުގައި ލިޔެފައިވަނީ 20 އަހަރު ދުވަހުގެ އުފާވެރި ހަނދާންތަކަށާއި ފުރިހަމަ ޚިދުމަތާއި މީރު ކާނާއަށް ޝުކުރު އަދާ ކުރާ ކަމަށެވެ. އަދި 2000 ޑޮލަރު އެތަނުގެ މުވައްޒަފުންގެ މެދުގައި ހަމަހަމައަށް ބަހާލުމަށް އެ މީހުން އެދިފައިވެއެވެ.
މި ރެސްޓޯރެންޓުގެ ޕޭޖުން ބިލުގެ ފޮޓޯއެއް ފޭސްބުކުގައި ހިއްސާކޮށް މި ދެލޯބިވެރިންނަށް ވަނީ ޝުކުރު އަދާ ކޮށްފައެވެ. އަދި މި ދަތި ވަގުތުގައި މިފަދަ ދީލަތި ހަދިޔާއެއް ދިނުމަކީ ތަނުގެ މުވައްޒަފުންނަށް ވަރަށް ބޮޑު ހިތްވަރެއް ލިބިގެންދިޔަ ކަމެއްގެ ގޮތުގައި ވެސް އެ ރެސްޓޯރެންޓުން ވަނީ ސިފަކޮށްފައެވެ.
