އައްޑޫން އިތުރު ހަތް މީހަކު ކޮވިޑް-19އަށް ފައްސިވެއްޖެ
އައްޑޫ ސިޓީން އިތުރު ހަތް މީހަކު ކޮވިޑް-19އަށް ފައްސި ވެއްޖެއެވެ.
އެ ސިޓީގެ ޓާސްކްފޯހުން މައުލޫމާތު ދެއްވާ ގޮތުގައި މިރޭ އިރުއޮއްސުނު ފަހުން ފައްސިވި ހަތް މީހުންގެ ތެރެއިން އެކަކީ އެއަތޮޅު ފޭދޫގައި ކަރަންޓުގައި ހުރި މީހެކެވެ. ބާކީ ހަ މީހުންނަކީ އިއްޔެ ފޭދޫން ފައްސިވި މީހުންނާ ޑައިރެކްޓް ކޮންޓެކްޓް ވި މީހުންނެވެ.
މިރޭ ފައްސިވީ ކޭސްތަކާއެކު އައްޑޫން ފައްސިވީ މީހުންގެ ޖުމުލަ އަދަދު މިވަނީ 76 އަށް އަރާފައެވެ.
މީގެ އިތުރުން މިއަދުގެ ކޭސްތަކާއެކު އައްޑޫ ސިޓީގެ ގުޅިފައިވާ ރަށްތަކުން ކޮވިޑަށް ފައްސިވީ މީހުންގެ އަދަދު ވަނީ 42 އަށް އަރާފައެވެ. އެއީ ހިތަދޫން ފައްސިވި 21 މީހުން، މަރަދޫ ފޭދޫއިން 4 މީހުން އަދި ފޭދޫ އިން 17 މީހުންނެވެ.
އެ ސިޓީގެ ހުޅުމީދޫން، ފަހުން ފައްސިވި 6 މީހުންނާ އެކީ އެމްޓީސީސީ ސައިޓުން ފައްސިވި މީހުންގެ އަދަދު ވަނީ 27 އަށް އަރާފައެވެ. އެ ސައިޓު ފިޔަވައި ދެން ފައްސިވެފައިވާ މީހުންގެ ޖުމުލަ އަދަދު ވަނީ ހަތަކަށް އަރާފައެެވެ.
އައްޑޫއިން މިހާރު 2665 މީހެއްގެ ސާމްޕަލް މިހާރު ނަގާފައިވާއިރު އޭގެ ތެރެއިން މިއަދު ނަގާފައި ވަނީ 257 ސާމްޕަލެވެ. އަދި މިހާރު ބަލި ޖެހުނު މީހުންގެ ތެރެއިން 29 މީހަކު ރަނގަޅު ވެފައިވާއިރު، ފަރުވާ ދެމުން އަންނަނީ 40 މީހަކަށް ކަމަށް ވެސް އައްޑޫ އިމަރޖެންސީ ސެންޓަރުން ބުނެއެވެ.
