ޙަޤީޤީ މުއުމިނަކީ އޭނާގެ އަވަށްޓެރިޔާ ބަނޑުހައި ހޫނުކަމުގައި ވަނިކޮށް އޭނާގެ ބަނޑު ފުރާލާ މީހާއެއް ނޫނެވެ.
މިއަހަރުގެ ބަރަކާތްތެރި ރަމަޟާން މަހާ ބައްދަލު ކުރަން ދެން އޮތީ 44 ދުވަހެވެ. ރަޙުމަތާއި ބަރަކާތުން ފުރިގެންވާ އެ މައްސަރާ ، އެންމެ ހެޔޮ ޙާލުގައި އަޅަމެން ބައްދަލު ކުރުމުގެ މަތިވެރި ނަސީބު މިންވަރު ކުރައްވާށިއެވެ. އާމީން!
ރަމަޟާން މަހަކީ އެމަހެއްގައި އަހަރެމެންގެ އުޅުމާއި ގުޅުންތަކަށް ބޮޑެތި ބަދަލުތަކެއް އަންނަ މައްސަރެކެވެ. އަޅުކަންތަކުގައި އިތުރަށް ހީވާގިވެ ، ފަރުޟު ނަމާދުގެ ޖަމާޢަތްތަކާއި ތަރާވީޙް ނަމާދު ނުވަތަ ދަމު ނަމާދުގެ ޖަމާޢަތްތައް ފުރިގެންދާ ތަން ފެނެއެވެ. ޤުރުއާން ކިޔެވުމަށާއި ޒިކުރު ކުރުމަށް ގިނަ ބަޔަކު މިސްކިތުގައި މަޑުކޮށްގެން ތިބޭ ތަން ފެނެއެވެ. ހަމައެހެންމެ އާއިލާ މީހުންގެ މެދުގައި އާއި ރަހުމަތްތެރިންގެ މެދުގައި ހަދިޔާ ބަދިޔާ ބަދަލު ކޮށް އުޅޭ ކަމީ ފެންނަ ނުހަނު އުފާވެރި މަންޒަރެކެވެ.
ހަމަ މިއާއެކު ފުއްސެވުމާއި ރުއްސެވުމުގެ މި ތަރުބަވީ މަދަރުސާއާ އަޅުގަނޑުމެން ކުރިމަތިލާއިރު އަޅުގަނޑުމެންނަށް ފަރުވާ ކުޑަ ކުރެވޭ ވަރަށް މުހިންމު ކަމެއް އެބައޮތެވެ. އެއީ އަވަށްޓެރީންނަށް ކަމޭ ހިތުމެވެ.
ކީރިތި ނަބިއްޔާ ޞައްލަﷲ ޢަލައިހި ވަސައްލަމް ޙަދީޘް ކުރައްވާފައިވާ ބަސްފުޅެއްްގެ މާނައިގައި ވެއެވެ.
"ޙަޤީޤީ މުއުމިނަކީ އޭނާގެ އަވަށްޓެރިޔާ ބަނޑުހައި ހޫނުކަމުގައި ވަނިކޮށް އޭނާގެ ބަނޑު ފުރާލާ މީހާއެއް ނޫނެވެ."
އަދިވެސް އެކަލޭގެފާނު ޞައްލަﷲ ޢަލައިހި ވަސައްލަމަގެ އެހެން ބަސްފުޅެއްގެ މާނައިގައި ވެއެވެ.
" އެމީހެއްގެ ނުބައިކަމުން އެމީހާގެ އަވަށްޓެރިޔާ އަމާންވެ ސަލާމަތް ނުވާ މީހާގެ ސުވަރުގެ ނުވަންނަ ހުއްޓެވެ."
ލޮބުވެތި މުސްލިމުންނޭވެ. ބަރަކާތްތެރި ރަމަޟާން މަހުގެ ބަރަކާތް އެންމެ ފުރިހަމަ ގޮތުގައި ޙާޞިލް ކުރެވޭނީ ރަސޫލާ ޞައްލަﷲ ޢަލައިހި ވަސައްލަމަގެ މިފަދަ އިރުޝާދުތަކަށާއި ހެޔޮ ނަޞީޙަތްތައް އަޑު އަހައި އެއަށް ޢަމަލު ކޮށްގެންނެވެ.
އަޅަމެންނީ އަވަށްޓެރީންނަށް ހެޔޮކޮށް ހިތާ ބައެއް ކަމުގައި ލައްވާށިއެވެ. އަދި ހިތް ނިޔަތް ޚާލިޞްކޮށް ކުރިއަށް އޮތް ރަމަޟާން މަހާ ކުރިމަތިލާ ބައެއް ކަމުގައި ލައްވާ އެމަހުގެ ހެޔޮ ދަރުމައާއި ފުއްސެވުން ލިބޭ އަޅުންގެ ތެރޭގައި އަޅަމެން ލައްވާށިއެވެ. އާމީން!
އާމީން