ލޮނުމެދު ބޭނުން ކުރުމަކީ ކޮވިޑް-19 އިން ރައްކާތެރި ކޮށްދޭ ކަމެއް ނޫން: ޑރ. މުޙައްމަދު ޢަލީ
ލޮނުމެދު ބޭނުން ކުރުމުން ކޮވިޑް-19 އިން ރައްކާތެރި ކޮށްދޭ ކަމަށް ބުނެ ދެކެވޭ ވާހަކަތަށް އެތެރެހަށީގެ ބަލިތަކާބެހޭ ޚާއްސަ ޑޮކްޓަރު ޑރ. މުޙައްމަދު ޢަލީ ދޮގު ކުރައްވައިފިއެވެ.
އާންމުން ހޭލުންތެރި ކުރުމުގެ ގޮތުން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ގެނެސްދޭ ވީޑިއޯ އެއްގައި ޑރ. މުޙައްމަދު ޢަލީ ވިދާޅުވީ ލޮނުމެދު ކެއުމުން ކޮވިޑުން ސަލާމަތްވެވޭ ކަމަށް ބުނެ ދެކެވޭ ވާހަކަތަކަކީ އެއްގޮތަކަށް ވެސް ތެދު ވާހަކަތަކެއް ނޫން ކަމުގައެވެ.
"ލޮނުމެދުގައި ހުރެދާނެ ބައެއް ކަހަލަ ކެމިކަލްތައް، އެކި ކަހަކަ ބަލިތަކުން ރައްކާތެރިކޮށްދޭ. ނަމަވެސް ލޮނުމެދު ބޭނުން ކުރުމަކީ ކޮވިޑުން ރައްކާތެރި ކޮށްދޭ ކަމެއް ނޫން." ޑރ. މުޙައްމަދު ޢަލީ ވިދާޅުވިއެވެ.
މި ވީޑިއޯގައި މީގެ އިތުރުން ޑރ. މުޙައްމަދު ޢަލީ ވިދާޅުވީ ކޮވިޑް-19 އިން ރައްކާތެރިވުމަށް ޖަހާ ވެކްސިނުން ޑީއެންއޭ ބަދަލުކޮށްލާ ކަމަށް ވެސް ބައެއް ފަރާތްތަކުން ވާހަކަ ދައްކާ ކަމަށެވެ.
"ކޮވިޑް-19 އިން ހެދިފައިވާ ވެކްސިނަކުން ވެސް އަދި މިހާތަނަށް ހެދިފައިވާ އެއްވެސް ވެކްސިނަކުން ވެސް އަދި އެއްވެސް ބޭހަކުން ވެސް އިންސާނެއްގެ ޑީއެންއޭ ބަދަލެއް ނުވާނެ!"ޑރ. މުޙައްމަދު ޢަލީ ވިދާޅުވިއެވެ.
